– Eg vil halde fram prosessen, men berre dersom Ørsta også vil. Det går ikkje an å tvinge nokon her, seier påtroppande ordførar Jørgen Amdam (Ap) i Volda til Møre-Nytt
I eit intervju med Sunnmørsposten sist laurdag sa Amdam at signala frå Ørsta etter valet tyder på at det ikkje blir noko samanslåing i denne fireårsperioden, og at kommunereforma har «spelt fallitt».
Overfor Møre-Nytt er Amdam klar på at han framleis ønskjer ei samanslåing.
– Har dei som røysta på deg fordi dei ønskjer ei samanslåing grunn til å føle seg svikta?
– Nei, slik ser ikkje eg det. Eg vil som sagt halde fram samanslåingsprosessen om det er grunnlag for det.
Aam vil halde fram
Påtroppande ordførar Stein Aam (Sp) i Ørsta har vore ein utprega skeptikar til samanslåing. Han avviser likevel at han vil stoppe utgreiingsprosessen som er sett i gang i begge kommunane. Denne skal munne ut i ei folkerøysting neste vår.
– Eg vil at utgreiinga skal gå sin gang, i tråd med vedtaket i kommunestyret. Vi skal setje oss ned og få svar på dei vanskelege spørsmåla før folkerøystinga. Det gjeld mellom anna Tussa-aksjane til Ørsta og investeringane Ørsta kommune har gjort i vatn og avløp. Når vi skal gjennomføre ei folkerøysting, skal folket ha eit godt grunnlag for å seie ja eller nei, seier Aam til Møre-Nytt.
– Dette signalet frå Aam er godt nok grunnlag for å halde fram prosessen fram mot folkerøystinga. Om den endar med eit fleirtal for samanslåing, så er det framleis mogleg at det skjer i denne fireårsperioden, svarer Amdam. Han moderer seg dermed samanlikna med det han sa i Sunnmørsposten førre veke.
Kritisk til prosessen
Amdam, som også er professor emeritus i samfunnsplanlegging ved Høgskulen i Volda, legg likevel ikkje skjul på at han er kritisk til måten kommunereforma blir gjennomført på.
– Ja, det ligg ein kritikk av regjeringa i botnen her. Det burde vore større økonomiske insentiv for å slå seg saman, og det burde vore gjort eit betre arbeid for å skape lokalt eigarskap til prosessen. I tillegg burde vi vore flinkare til å få fram fordelane med reforma.
– Kva er desse fordelane?
– Det som er tydeleg, er at det er relativt lite å hente på drifta av kommunane. Det viktigaste er å vere mest mogleg slagkraftige i kampen for å gjere regionen og dei institusjonane vi har her slagkraftige og sterke. Då meiner eg ein samla kommune vil vere betre rusta og ha større fagressursar.
– Vi treng å snakke med ei tunge i staden for to
Gledeleg overraska
Stein Aam helsar Amdam sin kritikk av kommunereforma velkomen.
– Eg vart gledeleg overraska då eg las det. Det ser ut til at han har forstått noko av det vi i Senterpartiet har argumentert for lenge.
Han legg ikkje skjul på at han meiner kommunane klarer seg godt kvar for seg.
– Ja, men det betyr ikkje at vi ikkje skal samarbeid. Eg ser gjerne at vi får fleire interkommunale samarbeid i Ørsta og Volda og elles i regionen. I tillegg er det svært viktig at vi står samla i kampen for å bevare Volda sjukehus og Høgskulen i Volda. Det er mykje viktigare enn kommunereforma, seier Aam.
Skal skape ei nei-rørsle
Amdam trur noko av det viktigaste for tilhengarane av ei samanslåing blir å overtyde utkantane.
– I sentrumskrinsane trur eg det allereie er fleirtal for samanslåing. På bygdene er det mange som fryktar at dagens offentlege tilbod forsvinn ved ei samanslåing. Ei viktig oppgåve blir å tydeleggjere at det ikkje nødvendigvis skjer.