Det foreslår administrasjonen i Ørsta kommune. Saka skal opp i formannskapet tysdag, vidare til levekårsutvalet og til kommunestyret for endeleg avgjerd i juni.

I tilrådinga står det:

«Ørsta kommunestyre vedtek å bygge fire nye klasserom med grupperom, garderobar og toalett på Velle skule, til saman om lag 500 m². Prosjektet omfattar også oppgradering av kapasitet på ventilasjonsanlegg, lukking av branntekniske avvik, etablering av arbeidsrom for tilsette og solskjerming. Prosjektet har ei samla kostnadsramme på inntil 24,9 mill. inkl. mva. og skal verte finansiert gjennom nye låneopptak.»

I saka kjem det fram at det er akutte behov for meir plass både ved Vikemarka skule og ved Velle skule. Det vert jobba med ei løysing for Vikemarka på kort sikt. Velle skule har fleire rom som er for små i høve auka elevtal, og administrasjonen seier at det er kritisk at arbeidsromma for personalet på loftet av skulen kan verte stengde på kort varsel grunna branntekniske tilhøve.

– Vi har også kome til det stadiet at vi må opprette introduksjonsklasse for nye framandspråklege elevar. Einaste moglege lokasjon for ei slik klasse er ved Velle skule. Vi har vurdert ulike alternativ som paviljongar og lettbygg. Dette vil ha ein kostnad på minimum fire millionar kroner, og vil dessutan ikkje lukke avvik. Ut frå dette er det difor mest fornuftig å bygge fire klasserom med grupperom, garderobar og toalett. Dette vil gi lovlege arbeidsrom for personalet, lovleg plass til elevane i dei 14 klassene skulen har no, og rom til ei introklasse.

Administrasjonen håper at prosjektet kan stå klart til skulestart hausten 2018, om planlegginga kjem i gang no før sommaren. I påvente av ferdigstilling av bygget må personalet ha tilhald på loftet eit år til, kunst og handverk vert flytta til kulturhuset, og introklassa får eit av dei klasseromma som i utgangspunktet er for lite til ei ordinær klasse. Planlagd tilbygg gir ingen auka kapasitet på Velle skule utover at der vert lovleg plass til normale klassestorleikar.

– Men vi ser for oss at flytting av Ørsta vidaregåande skule på sikt vil gi rom for utviding av skulen slik at denne kan vere ein «buffer» for toppane til både Vikemarka, Hovden og eventuelt Dalane skular. Dette er likevel eit stykke fram i tid, men ei forklaring på kvifor vi ikkje foreslår ei meir omfattande utbygging no.

I budsjettvedtaket for 2017 er det også sett av midlar til forprosjekt til Hovden og Sæbø skular.