I samband med Hjørundfjord mat- og kulturfestival i september, avslører arrangørane no det som kjem til å verte ein av hovudattraksjonane: Ein middag for åtti personar på Haukly, komponert av kokkane Nils Henning Nesje og Gunnar Nagell Dahl.

I noregstoppen

Nesje fekk i 2015 pris for beste lokalmatmeny, i 2017 vart han årets klippfiskambassadør, og han er kåra til Bondelagskokk for 2017 og 2018. Han er av kvinnemagasinet Kamille utropt til «Noregs herligaste kokk». I tillegg er han dommar i Det Norske Måltid og oste-VM.

Gunnar Nagell Dahl er grunnleggar av Matfestivalen i Bergen og er hovuddommar i Det Norske Måltid. Han vert omtala som den mannlege utgaven av Ingrid Espelid, og ein nestor innan lokalmat og kokkefaget i Noreg.

Med andre ord: det vert høg klasse over festmiddagen som finn stad laurdag 8. september.

Råvaredugnad

Middagen består av lokal, kortreist mat laga av reine råvarer.

– Lokalbefolkninga er i full sving med å dyrke poteter og urter. Vi hadde ein prat i vår om kven som kunne skaffe forskjellige råvarer som kjøt og grønsaker, seier Maria Nikkinen Rørstad, som saman med Nina Viddal er med å arrangere festmiddagen.

– Det er stor interesse for god, rein og ekte lokalmat. Folk har vorte meir og meir opptekne av kva dei puttar i seg, seier dei to.

Bygdefolket på Bjørke kjem til å få ein invitasjon og forkjøpsrett på billettar til middagen, før resten vert lagt ut for sal til øvrige gjester. Truleg vil det verte sett opp båt til og frå Bjørke laurdagen.

Svært kortreist mat

Men tilbake til menyen: Dei to kokkane er ekspertar på lokale, kortreiste råvarer og historiske norske matrettar. Dette kjem til å prege heile måltidet.

– Det vert minst ti rettar, som skal tilberedast på spesielle måtar. Vi tek utgangspunkt i dei mest nærliggande produsentane med sjølvdyrka ting. Vi snakkar om vinblad, hjort, argentinsk grill på høygaffel, pølser, boargeit og anna. Det skal vere leiken mat, servert på spektakulære måtar og krydra med gode historier, seier Nils Henning Nesje.

Han har vore på ingrediens-rekognosering på Bjørke, der han har plukka seg frampå med granskot og andre ville planter. Han vil også nytte vekstar frå havet, som tang og tare, i menyen.

– Dette kjem til å verte eit ganespa, med muntre historier og sleivspark attåt, lovar Nesje, som saman med kollega Nagell Dahl kjem til å underhalde gjestene undervegs i det omfattande måltidet.

Nina Viddal, som er lokal vinbonde på Haula Vineyard, har i samarbeid med kokkane sett saman ein vinpakke som kan nytast saman med dei mange rettane.

Ein arena for produsentane

Dagleg leiar Odd Magne Vinjevoll på Ørsta Næringskontor seier ideen til å stelle i stand ein mat- og kulturfestival kom rett før jul i fjor, då det vart laga eit nærmatmåltid på Bakketunet. Festivalen har utspring i masterplanen om å satse meir på turisme i kommunen.

– Turismesatsing vidare må innom kultur eller natur i nærmiljøet. Mat- og kulturfestivalen er med på å skape skape ein arena der lokalmatprodusentar kan få vist fram produkta sine. Kanskje kan dei verte ei attåtnæring som kan kombinerast med nærturisme. Logistikken i Hjørundfjorden byrjar verte bra, med veldig mange båtar som transporterer folk til plassane som er attraktive å oppleve. Grunnlaget for opplevingsturisme ligg på desse små plassane, der ein må bruke dei lokale skattane, som plantar, fisk og jakt, seier Vinjevoll.