– Litt av grunnen til at det ikkje gjekk så bra med økonomien til Ørsta kommune for nokre år sidan, var at vi som politikarar ikkje hadde føling med den økonomiske utviklinga. Då mista vi kontrollen, og hamna på Robek-lista, sa Rune Hovde då kommunestyret diskuterte tertialrapporten for andre kvartal i kommunestyret torsdag.
Hovde er kritisk til at kommunestyret ikkje får framlagt månadsrapportar om økonomi, og meiner politikarane har bedt om dette tidlegare.
– Vi kan sjølvsagt spørje om vi treng månadsrapportar når det går bra med kommunen? Det er ikkje lenge sidan vi var i uføre, og vegen tilbake dit kan bli kort om vi ikkje held handa på rattet.
Rådmann Wenche Solheim svarte at ho hadde oppfatta at det var greitt med rapportering litt sjeldnare (kvart tertial).
- Eg får månadsrapportar til meg, så eg har kontroll med pengebruken. Men desse er langt enklare enn tertialrapportane.
– Ja, men så gi oss desse då. Vi treng ikkje lange utgreiingar. Korte og konsise rapportar er heilt greitt, repliserte Hovde.