Vik Ørsta har teke på seg spanderbuksene, og kunne måndag overrekkje eit busskur av topp klasse, produsert hjå Vik Ørsta i Hovden, til Ørsta kommune ved kommunegartnar Olav Saure.
– Dette er kjempegreier, ja, det er sjeldan kommunen får gåver som dette, så dette er heilt utruleg. Med dette busskuret kan haldeplassen stå fram med respekt! Ivrar Saure. Han og mannskapet har sjølve lagt ned stor innsats for at det har vorte penare i sentrum siste året.
Starta
Det var på den gamle haldeplassen, mellom Kaihuset og Lystadhjørnet, at faren og opphavet til sentrumsdugnaden, Lars Oscar Fossen, starta skjennepreika og dommedagstalen over eit sentrum i nærast forslumma tilstand. I lang tid hadde eit øydelagt, skite og tagga gult busskur «pryda» området til stor irritasjon for folk flest. Fossen viste driv og eit smittande engasjement, og bidrog sterkt til at Vik Ørsta no har sponsa eit spesialteikna busskur, eller leskur, inkludert benker, boskasse og oskekasse i Publicus-serien.
– Det er givande å kunne bidra til dugnaden, og det er kjekt at våre produkt kan pryde sentrum i Ørsta, seier Tor Ose, Petter A. Sandnes og Jan Torgeir Hovden i Vik Ørsta.
Også andre stader i Ørsta sentrum finn ein leskur og andre utemiljøartiklar i svart, den offisielle utemiljøfargen til kommunen, produsert av Vik Ørsta.
– Sentrum forfell, det må takast grep!
Både Vik Ørsta og kommunen rosar Lars Oscar Fossen for initiativet, og det han personleg har ytt av midlar og innsats, og den driven han viser, for også å få andre til å gjere noko for eit betre og trivelegare utemiljø i kommunen vår.
– Det hadde aldri vorte nokon dugnad utan Fossen. Det som er så kjekt å sjå er alle som kjem etter, og som byrjar å måle og stelle eigedomane sine. Det «sprett» stadig opp stillas her og det, det er svært givande, synest Sandnes, Ose, Hovden og Saure.
I fred
Framover skal det pyntast litt til på haldeplassen, og nye tre skal plantast og andre skal beskjærast.
Og så er vona sjølvsagt at det nye leskuret får stå i fred.
– Det viser seg at når ting ser fint ut, inviterer ikkje det til hærverk, erfarer kommunegartnar Olav Saure.
Sjå framtidas Ørsta i Vikegata