Begge er råka av nervelidinga Mulitppel Sklerose (MS), ein sjukdom med varierande alvorligheitsgrad. Hanne Mette Dimmen fekk diagnosen for snart fem år sidan. Ho har ein attakkprega MS, med ei relativt roleg utvikling.
Diagnosen
Symtona var tydelege då ho i 2009 fekk diagnosen. – Eg merka at kroppen visna, eller sovna, frå halsen og ned. I tillegg fekk eg smerter når eg tok bort i ting, og den eine handa svikta, fortel 47-åringen.
Ho vart meir trøytt enn før. Diagnosen MS fekk ho relativt raskt. Dette førte til ein omstillingsprosess med både oppturar og nedturar.
– Eg såg føre meg at kurva gjekk rett ned. Men så oppdaga eg at folk har MS i alle aldrar.
Hanne Mette har ikkje hatt attakk sidan ho fekk diagnosen.
– I det daglege fungerer eg bra. Men eg har både gode og mindre gode periodar. Eg får smerter i kroppen ved stor aktivitet, fortel ørstingen som jobbar som frilans døvetolk.
Ho har valt å ikkje bruke medisin, sjølv om det i dag finst bra MS-medisinar på marknaden.
Sprøyte
Anita Aarseth Ørstavik (51) har hatt MS sidan 1991. For henne starta det med ein betennelse på synsnerven. Ho har hatt attakk fleire gonger, men ikkje etter at ho for vel 10 år sidan starta med daglege sprøyter. Dette har bremsa MS-utviklinga.
– Likevel er det slik at sjukdomen for meg utviklar seg. Det største synlege problemet mitt er at eg har problem med ein fot, og eg haltar noko. Elles vert eg fort gåen av stor aktivitet.
Hanne Mette Dimmen og Anita Aarseth Ørstavik er blide og livsglade damer som har valt å vinkle MS-sjukdomen på ein positiv måte.
– Eg lever i «nuet» og har det bra. For ein kan sjølvsagt ha eit rikt og godt liv sjølv om ein har ein sjukdom som kan få alvorlege følgjer, opplever Dimmen.
– Ja, og ein kan velje om ein vil setje seg ned og resignere, eller sjå på sjukdomen på ein positiv måte, vi har valt det siste, seier Ørstavik.
Lars Arne Nilsen
Komande tysdag inviterer Ørstavik og Dimmen til MS-møte i Røde Kors-huset i Ørsta i regi av Ålesund og omland MS-foreining.
Der skal Tidlegare Hødd-trenar Lars Arne Nilsen ha innlegg om målsetjing og motivasjon.
Ørstavik og Dimmen er to av kring førti medlemmer i MS-foreininga på Sunnmøre som tel rundt 300 medlemmer.
Foreininga plar halde møte ein gong i månaden. Og som regel vert møta haldne i Ålesund.
– Det er eit ønske om å flytte aktiviteten i laget meir ut i kommunane, fortel Ørstavik og Dimmen.
MS-laget sine aktivitetar er eit lågterskeltilbod. Den sosiale delen er viktig for medlemmene som deltek på reiser, også i utlandet, blåturar, julebord, fagseminar og anna – ein mix av både fagleg innhald og sosialt fokus.
Ein gong i året held laget fagdag i Ålesund, der det vert fokusert på ulike tema som t.d. forsking, medisinar, kosthald og trening.
– Vi ønskjer alle vel møtt til Røde Kors-huset komande tysdag. Vi ønskjer å ha med oss fleire. Det vert spennande å høyre kva den suksessfulle trenaren Lars Arne Nilsen har å fortelje.
På møtet vert det også gjeve informasjon om aktivitetane til laget. Og så vert det mat og kaffi og loddsal.
