Ørsta Brettklubb ønskjer å overta bruktbilhallen i Strandgata og har no søkt løyve om å flytte han.
Planen for plasthallen som skal fjernast frå gamle Ørsta Bil er no røpt. Ørsta Brettklubb (under skiping) har eit stort ønske om å overta hallen for å lage til eit organisert tilbod for rullebrettkøyrarar. Dei har vore i dialog med eigarane av hallen, og no har dei spurt kommunen om løyve til å flytte den til grusbana ved Ørsta stadion, med formål om å lage til ein innvendig rullebretthall.
Organisert miljø
I brevet poengterer dei mangelen av tilbod for rullebrettkøyrar i Ørsta, og forklarar at denne plasthallen vil fungere godt for føremålet deira. Idéen om å plassere den på grusbana ved Ørsta Stadion er skissert. Dei meiner dette er ei naturleg plassering av hallen.
– Det er viktig at hallen vert flytta dit det allereie er mykje aktivitet. Flyttar ein hallen til ein usentral plass vil miljøet verte ekskluderande, seier Knut Steinnes, som vil fungere som leiar i Ørsta Brettklubb når klubben er skipa.
– Her er inga god arena for skating i Ørsta. Mange reiser til utandørsanlegget i Volda, men det kan ikkje nyttast når det regnar. Går planen vår i boks vil tilbodet vere utfyllande også for dei som bur i Volda eller andre stadar. Ein innvendig rullebretthall vil bidra til å byggje opp eit ordentleg rullebrettmiljø som er trygt og inkluderande.
Dugnad
Dei håper planen vert raskt godkjent slik dei kan kome i gong med flytting og bygging av parken. Alt arbeid skal gjerast på dugnad, og midlane til bygging vert skaffa gjennom sponsorar.
– Alle vi har snakka med er positive til ideen og er gira på å hjelpe til med dugnad. Målet er å byggje ein hall av god kvalitet som kan passe både nybyrjarar og vidarekomne. Dette er første skritt for å etablere eit godt organisert rullebrettmiljø. Vi vil også arbeide for at fleirbrukshallen vert lagt til rette for rullebrett, BMX og sparke-/triksesyklar. Alt innvendig i plasthallen vil vere modulbasert slik at det enkelt kan flyttast til fleirbrukshallen seinare.
– Vi har ei von om at kommunen støtter opp under engasjementet, då vi veit at interessa og behovet for dette er stort.