– For tre år sidan var det to av mannskapet ved stasjonen i sentrum som hadde grunnkurs. No er det berre to som manglar det, seier brannsjef Einar Ytre-Hauge i Ørsta brann og redning.
Det er i første rekkje brannmannskapet i sentrum som har vore gjennom kurs og opplæring i denne perioden, men mannskapa på Sæbø og Vartdal står no for tur.
– Vi har hatt opptrening på røykdykkarar på Sæbø og Vartdal. Mange har vore gjennom grunnkurs, kurs i utrykkingskøyring, leiarkurs for utrykkingsleiarar, befal og spesialkurs i kjemikaledykking. Ørsta er eit mellomdepot om det skulle skje ei akutt forureining, og det forpliktar oss til å ha kvalifisert mannskap. Vi har no seks i mannskapet om det skulle skje eit kjemikalsk utslepp, og oppgåva då er å redde liv og stenge utsleppet. I situasjonar kan vi verte brukt på Søre Sunnmøre, seier brannsjefen.
Krav og eige ynskje
Det er både strengare krav grunnutdanning, leiar utdanning og sertifikat i tillegg eiga lyst til eit betre kvalifisert brannkorps som har ført til at kurs og opplæring har vorte ein prioritet.
– No har alle befal godkjent utdanning. Av eit mannskap på femten er det tretten som har teke eller som i ferd med å fullføre grunnutdanninga.
I tillegg har Ørsta brann og redning ein omfattande øvingsplan kvart einaste år. Den siste månaden har brannmannskapet vore med flyplassøving og har hatt øving med industrivernet på VikØrsta.
– Vi prøvar å leggje opp øvingane så realistisk som muleg, og det er eit vidt spekter frå hjartestartarar til brann og trafikkulykker.
To kvinner i mannskapet
Gjennom dei siste åra har det og vorte fleire kvinner i brannvernet i Ørsta. Siri-Ann Aurstad har vore tilsett i sju år, og Liv Strand har vore tilsett i to år.
– Det er ikkje så mange kvinner i brannmannskapa i Noreg, men det har vorte fleire. Vi har berre positive erfaringar med det. Vi skal og spegle att samfunnet, og då treng vi også mangfald. Kvinner i korpset er ein positiv miljøfaktor. Dei får ikkje særskild behandling, og deltek og utfører den same jobben mennene, og må bestå dei same testane.
Brannsjefen er nøgd med utviklinga som Ørsta brann og redning har hatt dei siste åra.
– Vi er eit godt lag, og det viser og resultata på aksjonane. Vi taklar det på ein god måte, og tek stadig nye steg. Det stoppar ikkje der, og vi skal framleis ha trykk på vidareutvikling då det heile tida dukkar opp nye utfordringar.