Gotteberg presenterte torsdag framlegget til ny akuttmedisinføreskrift og endringar i føreskrifta om pasientjournal til politikarane i levekårsutvalet.

Det er Helse- og sosialdepartementet som har sendt på høyring framlegget til føreskrift om krav til og organisering av kommunal legevaktordning, ambulanseteneste, medisinsk nødmeldeteneste, inkludert  legevaktsentral - og forslag til endring i føreskrift om pasientjournal.

– Intensjonane med føreskrifta er gode og ambisiøse. Og det er prisverdig at departementet stiller krav til kompetanse, ansvar og forsvarlegheit, meiner kommuneoverlege Gotteberg.

Han registrerer at aldri før har kommunane sitt ansvar for desse tenestene vore artikulert så klart og forpliktande. Gotteberg meiner kommunen får utfordringar med innføringa.

– Det vil av mange årsaker, spesielt av omsyn til økonomi og personell, vere særs krevjande for kommunane og for tenestene å raskt leve opp til så ambisiøse intensjonar, seier Gotteberg. Han meiner krav til kompetanse og bakvakt kan verke overdrivne.

Legar

For å sikre forsvarlegheit og kvalitet, stiller departementet strenge kompetansekrav både til legar og anna personell i legevaktordningane. Kompetansekravet for lege som har lov til å gå sjølvstendig legevakt omfattar både krav til grunnkompetanse og tilleggskompetanse.

– Legen må anten vere godkjent spesialist i allmennmedisin eller ha gjennomgått tre års rettleia teneste for å få løyve til å praktisere som allmennlege. Legen, og helsepersonell som arbeider saman med legen i vakt, skal dessutan ha gjennomført kurs i akuttmedisin og kurs i valds- og overgrepshandtering, fortel Gotteberg.

Dei som ikkje oppfyller kompetansekrava har ikkje høve til å gå sjølvstendige vakter, men må ha kvalifisert bakvakt disponibel både i nødrett og for utrykking. Det er ikkje tilstrekkeleg med telefonbakvakt.

Det er også slik at turnuslegar ikkje kan gå sjølvstendige vakter men må ha den omtala bakvaktsordninga.

– Det har aldri vore stilt så omfattande og detaljert kompetansekrav til legevakt, konstaterer kommuneoverlegen.