Onsdag var geologar frå Asplan Viak på plass i Vatnedalen for å gjere vuderingar knytt til steinraset i Vatnesvingane. Raset gjekk seint laurdag kveld, og vegen mellom Vatne og Hunnes er framleis stengt.
Tidlegare i år gjekk Ørsta kommune til innkjøp av drone. Fram til og med onsdag har drona m.a. blitt brukt til å ta bilete og video av kommunale tomter, men for å hjelpe geologane vart dronen for første gang nytta i beredskapsarbeidet. Gjennom dronen fekk kommunen sikra både bilete og video av rasløpet som seinare vart nytta i arbeidet til geologane.
Geologane meinte at rasløpet måtte reinskast før vegen kunne opne att. Arbeidet med å reinske rasløpet starta torsdag og held fram fredag. Kommunen skriv på sine heimesider at Vertikal Service er inne i området og fjernar farlege steinblokker.