Trafikken gjekk ned med 10,8 prosent i mai 2016, samanlikna med same månad i fjor. Det viser den offisielle statistikken frå Avinor. Det reiste til saman 8352 passasjerar til og frå lufthamna i mai, medrekna transferpassasjerar.
Nedgangen er likevel mindre kraftig enn i mars og april. Då gjekk tala ned med 13,2 prosent og 12,5 prosent.
Til no i år har Ørsta Volda lufthamn, Hovden hatt ein trafikknedgang på 6,7 prosent. Ein del av nedgangen kan forklarast med at det går færre fly til og frå Hovden enn i fjor. Dermed er det færre sete tilgjengeleg.
Som Møre-Nytt har skrive tidlegare, er det likevel grunn til å tru at kommersialiseringa av ruta til Oslo, nedgangstidene i delar av næringslivet og innføring av nye avgifter påverkar tala. Særleg kommersialiseringa og nye avgifter har ført til høgare prisar på flybillettane. Det har næringslivet reagert på, sa dagleg leiar Odd Magne Vinjevoll i Ørsta Næringskontor til Møre-Nytt tidlegare denne månaden.
Det er Florø lufthamn som har kraftigast nedgang på kortbanenettet til no i år (-18,3 prosent). Ålesund lufthavn har ein nedgang på 2,4 prosent.