Då er det særleg viktig at me som har fått plass i kommunestyret, tek ansvar og har god dialog med dei unge.

Tare Øverbø peikar på denne store utfordringa i kommentaren sin i Møre-Nytt 14. september, der han skriv om manglande representasjon av unge i kommunestyret.

For sjølv om det kan vere litt tungt å svelgje, må sjølv me som er av dei yngste i kommunestyret, berre innsjå at me ikkje er unge nok til å kunne snakke på vegner av dei unge i Ørsta.

Skal me sikre betre representasjon, må både politikarar og veljarar vere med på å gje plass til dei unge. For det fyrste må me oppmode veljarar om å røyste på gruppene som er underrepresenterte. Me veit mykje om kven personrøystene tener, og det er ikkje dei unge, og det er heller ikkje kvinner. Valresultatet i Ørsta er eit svært godt døme på det. I vallistene til partia var snittalderen til saman 51 år, noko som i utgangspunktet er høgt. Snittalderen på oss som faktisk er valde inn, nærmar seg 54 år. Berre 11 av 33 er under 50 år. 42 prosent av dei som stilte til val var kvinner, men kvinnene utgjer berre 36 prosent av kommunestyret.For det andre må me politikarar arbeide for å gje dei unge plass i partiet vårt, støtte dei i engasjementet sitt og gjere dei synlege.

Når me veit korleis personrøystene fungerer, kan me til dømes vere endå meir medvitne om kven me set høgt på vallistene og kven me kumulerer. Når dei unge ikkje kjem inn i kommunestyret, får heller ikkje partia rekruttert nye til å delta i det politiske arbeidet, og då har det ein sjølvforsterkande effekt. Folk røystar på kandidatar dei veit kven er. I tillegg veit me at mange unge kvir seg for å stille til val, særleg på grunn av hets i sosiale medium. Der har me alle ein jobb å gjere. Både ved å forsvare dei som vert utsette for hets og ved å arbeide for og bidra til eit godt debattklima i alle forum.

Særleg viktig er det at me politikarane har god dialog med ungdomane i kommunen. Eg håper me får eit aktivt ungdomsråd, og at me får mange gode innspel til korleis me kan gjere Ørsta til ein betre kommune for unge. Me treng òg innspel til korleis me kan lyfte fram dei unge røystene. Skal me få bukt med dette problemet, må me finne løysingar saman. For som Tare Øverbø peikar på: Dei unge veit best korleis det er å vere ung i Ørsta. Og så må me som har fått den enorme tilliten det er å sitje i kommunestyret, bruke den tilliten til å lytte til og vere talerøyr for dei gruppene som ikkje er godt nok representerte i lokaldemokratiet.

Synnøve Marie Sætre

Kommunestyrerepresentant for Ørsta SV