NFF har sett i gang eit inkluderingsprosjekt for å kartleggje og auke fokuset på dommarar med minoritetsbakgrunn i Noreg. Førre torsdag var det impulssamling i Ålesund, og på samlinga deltok far og son Taher Tamimi (43) og Abbas (17) frå Ørsta. Både Abbas og Taher representerer Ørsta IL. 17-åringen har i tillegg spelt fotball for Ørsta. Han har hatt ein plan om satse fullt og heilt på dømminga om han fekk dømme i 4. divisjon, og det har skjedd.
– Eg har sett meg mål om å verte toppdommar slik som dei beste dommarane i Noreg, seier Abbas.
FIFA-dommar Svein-Erik Edvardsen er prosjektleiar, og til Ålesund hadde han med seg FIFA-dommar Svein Oddvar Moen som hadde forelesing for dommarane med minoritetsbakgrunn på Sunnmøre. I tillegg representerte Øyvind Kringstad, dommarsjef, Sunnmøre fotballkrins. Edvardsen informerte om inkluderingsprosjektet, og det vart utveksla erfaringar og snakka om vegen vidare. I alt ti dommarar frå Sunnmøre tok del i impulssamlinga.
Bakgrunn
Norges Fotballforbund sin visjon «Fotball for alle» gir organisasjonen klare forpliktingar til å legge forholda til rette for at alle grupper som vil skal få delta i fotballen. Inkludering er politisk forankra i visjonen og operasjonalisert i strategidokument og handlingsplanar. NFF deltek også i UEFA sitt mangfaldsprosjekt som vart lansert 1. januar 2015 – «Captains of Change» der NFF i 2015 vil gjennomføre eit pilotprosjekt for å auke delen unge leiarar med minoritetsbakgrunn. I tillegg til dette har NFF sett i gang eit prosjekt for dommarar med anna etnisk opphav. Ifølgje NFF er det openbart at dei har mykje å lære av denne gruppa dommarar når det gjelder fordeler og ulemper, kva som kan gjerast annleis for å gjere kvardagen enklare, kva som kan gjerast for å sikre stor rekruttering, god utvikling, god oppfølging og generell god ivaretaking av alle deler knytt til dommarrolla. I den anledning har NFF gjennomført ei kartlegging i alle fotballkrinsar, og det vil bli arrangert impulssamlingar ulike stader i landet.
– Resultatet av kartleggingsfasen viser at det er 555 dommarar med anna etnisk opphav i Noreg. Dette utgjer 20,2 prosent av det totale dommartalet, seier Edvartsen til fotball.no.