Ørsta senterparti ser arbeidet med barn og unge som svært viktig. Det er alvorleg at fleire unge opplever utanforskap. Alle skal kunne delta i aktivitetar og oppleve sosial aksept og inkludering, både i fritid og på skule. Vi ønsker ungdomstiltak som skaper trivsel, og som forebygg rus og ungdomskriminalitet
Senterpartiet i Ørsta ønsker å samarbeide med og støtte frivillige lag og organisasjonar som tilbyr varierte fritidsaktivitetar og møteplassar for barn og unge. Her må vi også få til ein god dialog med ungdomen sjølv. Vidare drift av tilboda ved “Kaihuset” må halde fram. Det har vore vanskeleg å finne ein egna plass for tilrettelegge for motorsportanlegg og mekkeplass for ungdom, og det må vi arbeide meir for i samarbeid med lokalt næringsliv og ungdom.
Helsestasjonen for ungdom må framleis ha ope på ettermiddag, og vi ønsker auka ressursar til helsesjukepleiarar i skulane. Kommunen må prioritere forebygging når vi ser auken i psykiske lidingar blant barn og unge, og Ørsta Sp ønsker auka innsats på området psykisk helse.
Senterpartiet har den siste perioden løfta fram arbeidet med trafikktrygge vegar, og dette blir eit viktig område for kommunen også dei neste fire åra, ikkje minst skulevegar. Senterpartiet foreslo i år 1 million for å starte arbeidet med trafikksikker skuleveg til nye Velle skule. I fylkestinget vil vi også arbeide vidare for meir gang- og sykkelvegar og trafikksikre kryss. Ørsta Sp vil gi økonomisk støtte til nærmiljøtiltak på bygdene, og halde fram med ordninga Fram Flexx for å gi eit eit tilpassa kollektiv-/busstilbod for ungdom i heile kommunen.
Ulike idrettsanlegg i sentrum og på bygdene er skapt gjennom samarbeid mellom frivillege lag, organisasjonar, kommune og lokalt næringsliv. Det gir ungdom rikhaldige tilbod som bidreg til trivsel, samhald og identitet, og gjer oss til ein attraktiv kommune å bu i. Ørsta senterparti vil satse på idrett- og kulturliv i heile kommunen. Vi vil gi tilskot til forsamlingshus, idrettsanlegg og nærmiljøanlegg, sikre årlege løyvingar til kulturskulen, festivalar og kulturtiltak, og gi kulturmidlar til songkor og korps. Sjølv om dei økonomiske rammene er tronge, vil vi i perioden prioritere å bygge nytt symjebasseng.
Per Ivar Lied, Senterpartiet