I årevis har Åmdalen venta på gangveg langs fylkesvegen. Vegen som er gjennomfartsåre til turistmagneten Hjørundfjord sommarstid, og Ørsta skisenter som trekker folk frå heile Søre Sunnmøre vinterstid. Vegen som strekker seg mellom to skular og ein barnehage. Mellom badeplassar, idrettsanlegg og ungdomshus. Åmdalen er ei levande bygd, og har berre fylkesvegen å nytte seg av for å kome seg til og frå både skule, vener og aktivitetar.
Ungane våre vert sendt med bussen til skulen. Sjølv om avstanden er kort nok, er vegen for utrygg til å gå. Det er heller ikkje lett for skulane og barnehagen å ta borna med på tur når ein må krysse eller gå langs ein fylkesveg som både er smal, uoversiktleg og trafikert med både traktorar, melkebilar og lastebilar som køyrer til og frå grustak. Skal Dalane skule til badeplassen må dei gå eit parti med 80-sone, og krysse vegen utan fotgjengarfelt.
Nyleg kunne UP måle over 90 km/t på ein bil som raste forbi skulen, midt i skuletida. Dette er berre eitt av fleire tilfelle som kunne gått mykje verre enn eit inndratt førarkort. Vi har opplevd fleire dødsulykker, ulykker og nesten-ulykker der dei mjuke trafikantane har måtte lide. Kor mange fleire ulykker må skje før gangvegen vert bygd?
Det står store ord om at reguleringsplan er på trappene, men realiteten er at midlane øyremerka gangveg i Åmdalen er meir enn halvert sidan sist investeringsprogram vart vedtatt. Det beviser nok ein gong at eit vedtak er kun gyldig til eit nytt er vedtatt. Politikarane lokalt må halde trykket oppe og sikre at også bygdene har trygg skuleveg. Vi har verken tid eller fleire liv å miste.
Hildegunn Welle, leiar i Brautaset grendelag