Den siste tida har vi lest og høyrt om uverdige forhold i eldreomsorga i Noreg, både når det gjeld heimetenesta og på sjukeheimar. Det gjer vondt å sjå at eldre ikkje får ei verdig omsorg.

I dag er målsetjinga for eldrepolitikken at dei fleste skal kunne bu heime så lenge det er mogleg. Vi høyrer også at det er for få sjukeheimsplassar til alle som treng det.

Vi er pårørande til eldre i Ørsta kommune. Gjennom den tida foreldra våre har fått hjelp frå tenestene i Ørsta kommune, har vi møtt vilje til å finne gode løysingar både frå leiinga og dei som utfører tenestene.

Vi har fått svært stor respekt for den jobben dei tilsette gjer for å bidra til gode vilkår for brukarane. Faren vår døydde før jul, 96 år gammal. Dei siste åra hadde han hjelp frå heimetenesta morgon og kveld, slik at han kunne bu heime. Det siste halvåret hadde han også korttidsopphald på Ørstaheimen, ei veke i månaden.

Her fekk han høve til opptrening, noko som gjorde at han kunne halde fram med å bu heime. I desember blei han sjuk og døydde etter kort tid. I denne perioden fekk han god pleie på korttidsavdelinga, der han kjende seg trygg. Personalet viste ei rørande omsorg, både for faren vår og for oss. Både han og vi kjende oss sikre på at han fekk den medisinske behandlinga han trengde. Sjukepleiarane og legen informerte og drøfta behandlinga med oss. Slik dei tilsette møtte både han og oss med profesjonalitet, varme og respekt, var uvurderleg for oss alle i ei tung tid.

Etter at far vår døydde, har dei tilsette i heimetenesta følgt opp mor vår heime. Den omsorga dei har vist i denne fasen er imponerande. Kombinasjonen av personleg involvering og profesjonalitet gjer det godt å vere brukar og pårørande. Å vite at det kjem folk innom kvar dag, gjer det mogleg å bu heime. Ikkje minst er det tryggare enn om denne tenesta ikkje var tilgjengeleg.

Til dei tilsette i heimebasert omsorg og på sjukeheimen, vil vi seie tusen takk for den jobben de gjer! Måten de møter brukarane på er svært viktig for oppleving av ein verdig alderdom.

Til politikarane vil vi seie: Vi har erfart ei eldreomsorg som fungerer, ikkje minst på grunn av dyktige tilsette. Ta vare på dei tilsette og ein organisasjon som bidreg til at dei eldste i kommunen får ein verdig alderdom. Det føreset vilje til å nytte ressursar på tilboda, men det vil truleg lønne seg på sikt.

Gerd Sylvi Steinnes

Ingunn Steinnes