Når skjer det ei alvorleg ulykke der bil og born er innblanda bak Ørstahallen? Mange foreldre er bekymra over ein uoversiktleg og farleg trafikksituasjon rett ved og mellom aktivitetsparkane bak Ørstahallen. Her spring det dagleg små og større born mellom kjekke leikeareal, som er laga for at ungane skal få utfalde seg med sykkel, skatepark, på minitrampoliner og i leikeparken. Her skal born, foreldre og alle generasjonar ha det kjekt ilag i trygge rammer. Rett gjennom leikeområdet går det framleis bilveg med til tider stor trafikk til fotball-banene.
Det interne idrettsområdet er planlagt bilfritt og bør vere bilfritt. Så lenge det går ein open veg gjennom leikeområdet mellom pump-track/sykkelbana og skateparken, vil det kunne oppstå farlege situasjonar. Resultatet av eit møte mellom bil og ein fireåring veit alle. Her hastar det med ei opprydding og sikker leikesone!
I dei næraste åra vil vidaregåande skule bli flytta, og det vil bli frigjort areal til parkering. Men i mellomtida må det vere ordna forhold og trygt for born der det er tilrettelagt for samla og uorganisert leik. Eg forstår at fotballgruppa uttrykker behov for parkering, men for meg er det uforståeleg at fotballgruppa er uenig i restriksjonar og trygge leikeområde for born. Det er suverent med alle i fotballmiljøet som kvar dag frivillig står på for aktivitet for born og ungdom, men fotball har også eit ansvar for å bidra til sikre forhold når treningane inneber mykje transport til og frå der mange born er samla til fri leik og andre aktivitetar. At dei som skal på trening ikkje kan gå nokre meter eller minutt til trening er umuleg å forstå - det kan vel vinklast som god oppvarming? Vi har alle lita tid, men dette handlar mest om haldningar og handlingar - vi kan alle ta ansvar for eit minutt ekstra for å sikre våre minste. Dei er opptatt av leiken, ikkje av bilane rundt - det er vårt vaksne ansvar.
Eg håper fotballgruppa kan vere ein klar medspelar for trygge omgjevnader for borna våre, og ha ei klar haldning til foreldre og ungdom om å bruke parkeringa framfor Ørstahallen og gå den korte avstanden til fotballbana.
Per Ivar Lied