I denne veka så går det spente førsteklassingar inn portane til Ørstaskulen. Bak dei står minst like spente foreldre som håper på at skuletida skal gi dei trivsel og venskap og etter kvart mykje god læring. Smilet og gløda i augene når dei stolt kan seier; «eg kan lese» er eit av dei viktige høgdepunkta i livet både for eleven, foreldra og for lærarane.
Dessverre så er det ikkje alltid at det vert slik. Nokre av elevane våre treng meir hjelp enn andre for å eit godt utbytte av skuledagen. Den hjelpa må ein få så tidleg som råd, og det før utfordringane i skulen vert for store og eleven mister trua på seg sjølv. Elevar er ulike og lærer på ulike måtar.
Ørstaskulen har hatt ei god fagleg utvikling dei siste åra. Resultata har vore gode med omsyn til ressursbruken. Likevel så opplever vi at der er elevar som sjølv i ungdomsskulen har eit svært lavt nivå når det gjeld lesing. Tilstandsrapporten for grunnskulen 2022 viser at over 1/3 ligg på dei 2 lågaste nivåa.
Kva må til for at desse elevane skal få god nok hjelp til å knekke lesekoda? Ventar vi for lenge, i håp om at eleven skal «modnast» og utfordringa skal gå over? Eller er det mangel på ressursar eller fagleg kompetanse i skulen? Årsakene er heilt sikkert fleire, men dette er ei utfordring som vi som skuleeigarar må ta tak i!
Ørsta Høgre har eit mål om ein skule som legg vekt på fagleg og sosial meistring. Skulen skal sjå kvar elev og prioritere tidleg innsats. For å lukkast må vi sørge for å bruke ressursane våre rett, og ha nok lærarar og miljøarbeidarar som har tid til å prioritere dei som har behov for det. Det seier seg sjølv at det ikkje er mogleg å følgje opp alle utfordringane for ein lærar som samtidig skal undervise 20 til 30 andre elevar. Vi ønskjer fleire ulike faggrupper inn i skulen, men med tydlege rolleavklaringar og arbeidsinnhald. Då kan læraren få lov å vere lærar og fokusere på det pedagogiske ansvaret.
Dyktige og motiverte lærarar og miljøarbeidarar er den viktigaste enkeltfaktoren for å skape ein god skule. Det er difor viktig å gi dei naudsynt støtte og fagleg utvikling innan sine fagfelt.
Tidleg innsats er ei investering i betre læring, betre livskvalitet og betre økonomi for kommunen på sikt.
Ørsta Høgre
Ann Karin Sætre og Per Are Sørheim