På kommunestyremøte i Ørsta torsdag 15. juni fekk vi ei orientering om stoda for det nye Ørsta kultur- og kompetansesenter (KKS). I den orienteringa vart det framlagt to alternativ til eit felles bygg for fylkeskommunen og kommunen. På spørsmål i frå Ørsta KrF om bomberommet og skyteanlegget framleis var med i det ombygde alternativet, fekk ein diverre beskjed om at det ikkje låg inne no. Når vi tidlegare har fått framvist ulike skisser, har bomberommet og skyteanlegget vore med som eit av dei framlagte alternativa. Kven har bestemt at bomberommet og skyteanlegget ikkje lenger skal vere med som eit alternativ?

Dette uroar oss. Vi har med jamne mellomrom i fleire år bedt om at ein kan bevare både bomberommet og skyteanlegget. Når ein ser kva som skjer i Europa der krigen mellom Russland og Ukraina har komme tett på oss, er det ønskeleg at ein tek vare på dei bomberomma ein allereie har. Vidare har Hovdebygda og Ørsta skyttarlag i mange år lagt ned ein enorm frivillig dugnadsinnsats for å få minatyrskyteanlegget sitt i Ørsta til det moderne anlegget dei har i dag.

Korleis vert prosessen med Ørsta KKS vidare? Det vart under orienteringa til kommunestyret i Ørsta i dag vist til at det skulle vere eit møte om dette i neste veke. Kven er det som skal delta på det møtet?

Kan ein her tenkje at viss ein ikkje flyttar skyttarlaget ut av Ørsta KKS, så sparer ein ein del areal på den tomta som skyttarlaget har fått tildelt av kommunen på Mosflata? Ville ikkje det også vere eit pluss i denne saka eventuelt?

Skyttarlaget har sendt eit brev til kommunen i mars i år som dei framleis ventar svar på, sjå vedlagte lenkje til ei avissak i Møre-Nytt nedst i saka her.

Det er i alle høve fint om involverte partar vert informert om stoda undervegs. Slik det vart presentert i dag står vi att med to alternativ. Kven er det som har valt ut dei to alternativa, sett i høve til at vi på tidlegare orienteringar har fått sett fleire ulike alternativ? På den skissa som vart vist på storskjerm på Ørsta rådhus i dag, stod det vel at ungdomslaget framleis hadde lokale på kulturhuset, viss det ombygde alternativet vart realisert.

For oss lokalpolitikarar resulterte denne orienteringa i mange ettertankar. Korleis kan vi vere med å forme til framtida sine bygg i Ørsta viss vi ikkje får uttale oss om dei to alternativa som vart presentert i dag? Det var ikkje lagt opp til ei handsaming av alternativa, no var det berre ei orientering.

Vi ber om svar til oss politikarane i Ørsta på dette før møtet om Ørsta kultur- og kompetansesenter som skal vere i neste veke. No hastar det for Hovdebygda og Ørsta Skyttarlag å få svar på kva som skjer med lokalitetane deira. Dei treng eventuelt å komme i gang med både å få planlagt og finansiert ein eventuell ny miniatyrskytebane på Mosflata, viss det vert aktuelt å flytte dit.

Hjørdis Almelid Vikenes, gruppeleiar og ordførarkandidat Ørsta Kristeleg Folkeparti

Trond Vartdal, leiar Ørsta Kristeleg Folkeparti

Hans Olav Myklebust, gruppeleiar Ørsta Framstegsparti

Tore Thon, leiar og ordførarkandidat Ørsta Framstegsparti

Anne Sølvi Vatne, gruppeleiar Ørsta Høgre

Sven Castberg, leiar Ørsta Høgre

Per-Are Sørheim, ordførarkandidat Ørsta Høgre

Gunnar Knutsen, gruppeleiar Ørsta Venstre

Are Folkestad, ordførarkandidat Ørsta Venstre

Tove Halse Digernes, leiar, gruppeleiar og ordførarkandidat Ørsta Senterparti