Trafikklyssystemet fortel om oppdrettarane kan auke (grønt), må fryse (gult) eller redusere (raudt) produksjonen og har vore sterkt omdiskutert. Mellom anna gjekk oppdrettarane i område 4, Nordhordland til Stadt, til rettsak mot staten etter nedjusteringa i 2020. Avgjerdene bygger på miljøpåverknaden av lakselus og resultata av kontinuerleg overvaking av lakselus.
I eit skriftleg spørsmål til fiskeri- og havministeren peikar Jørgensen på at ved førre vurderingsrunde vart fargane sette tidleg i februar. Systemet skulle gjere det meir føreseieleg for oppdrettarane og sikre overleving for villaksen. No skal oppdrettsselskapa snart sette vårfisken i sjøen og han spør kvifor ministeren ikkje har presentert trafikklysfargane for 2022–2023.
I svaret viser fiskeri- og havminister Bjørnar Skjæran (Ap) til at det vart arrangert dialogmøte etter at rapporten som avgjerda skal bygge på, var klar i november. Innspela var klare i januar, og dermed var grunnlaget for avgjerd to månader forseinka i høve til tidlegare år.
Skjæran skriv også at avgjerda om fargelegging er av stor betyding for havbruksnæringa, men også for villaksen. Det er difor ei avgjerd ein ikkje skal ta lett på, og det er heller inga enkel avgjerd. Grundige vurderingar vil nødvendigvis ta noko tid, skriv ministeren.
(©NPK)