– I Oslo og kommunane rundt Oslo seier nær to av tre, 64 prosent, at deira neste bil skal vere ein elbil. Men i dei aller mest spreiddbygde strøka er det berre éin av tre, 33 prosent, som seier det same, fortel Thor Egil Braadland, myndigheitskontakt i NAF, i ei pressemelding.
– Dette betyr at bilparken i sentrale strøk vil bli bytt ut i eit svært høgt tempo i dei kommande åra, seier han.
Totalt seier 54 prosent av alle bileigarar i Noreg at deira neste bil skal vere ein elbil, ifølgje Norstat-undersøkinga gjennomført for NAF.
– Pilene peikar berre éin veg no. Interessa for elbil er aukande, og det ser vi både i desse tala og i salstala for elbilar. Det er ventelister på nye elbilar, og det blir omsett rekordmange brukte elbilar, seier Braadland
Så langt i år er det kjøpt og selt 56.000 brukte elbilar, og 60.000 nye elbilar. Elbilar utgjer no 17 prosent av bruktmarknaden og 78 prosent av alle nye bilar selt.
Elles viser undersøkinga at det framleis er ein del elbilmotstand blant eldre bileigarar. Blant dei over 60 år svarar 12 prosent at dei er «svært ueinige» i påstanden om at «min neste bil skal vere ein elbil». Landsgjennomsnittet er ni prosent. Om ein legg til delen som svarar «ueinige», svarar kvar femte bilist over 60 år, 19 prosent, at deira neste bil ikkje blir ein elbil. Folk i 30-åra er mest positive.
(©NPK)