Dermed er det Fylkesmannen i Møre og Romsdal som må ta avgjerd i saka.

Endre Sætre klaga på vedtaket om buplikt i samband med overdraginga av garden. Landbruksnemnda har gjeve tre års utsetjing på buplikta, men Sætre meiner uansett at dette kravet vil hindre han i å drive næringsutvikling på bruket.

– Bustadeigedom for ein person

Etter møtet i landbruksnemnda måndag, var Sætre vonbroten.

– Eg såg i dag ei nemnd som ville seie ja, men som følte seg bundne av eit prinsipp dei ikkje våga å bryte. Dei greidde ikkje differensiere i saka. Det har ikkje diskutert kva som er alternativet. For konsekvensen er at nemnda no gjer ein næringseigedom på 3.000 mål om til ein bustadeigedom for ein person, kommenterer Sætre.

Han tok måndag i mot landbruksnemnda på eigedommen på Sætre. Han og kona Olianne og familien bur i Asker, og har planar om å utvikle gardsbruket til reiselivsføremål mellom anna. Dei ynskjer framleis å bu i Asker, men gjennom ymse avtalar har dei folk som ser etter bruket, tek seg av turistane, medan dei sjølv så ofte dei kan er på Sætre inst i Hjørundfjord.

Familien ser på buplikta som eit hinder for utviklinga, fordi dei då sjølve vil ta opp eit allereie knapt areal på innmarka.

Under synfaringa fekk han leggje fram saka si, før ho vart handsama på rådhuset i Ørsta.

For landbruksnemnda var det frykta for presedens, altså at også andre vil søkje og krevje fritak for buplikt, som vart avgjerande.

– Eg synest dette er ei vanskeleg sak. Det kunne ha vore freistande å gje fritak, men eg er ikkje i tvil om at det har kan verte ein presedens for seinare saker. Vi skal også tenkje likebehandling, sa Gina Bjørdal (Ap).

Anne Sølvi Vatne Bjørdal (H) viste til tidlegare saker, der det har vore vilkår om buplikt.

– Likevel er dette ei unik sak, i og med at det er lagt opp til ei slik turistsatsing, sa Vatne Bjørdal.

Sigve Aklestad (KrF) peika på at det uansett er snakk om eit tre års fritak for buplikt.

– Og på dei tre åra kan mykje hende. Lova kan verte liberalisert, sa Aklestad.

Også Idar Vatne (Frp) og utvalsleiar Ola Perry Saure (Sp) peika på omsyna til lovverket og krava om buplikt.

Dermed vedtok landbruksnemnda samrøystes å stå på sitt førre vedtak, om å gje Endre Sætre konsesjon til å overta bruket, men med vilkår om buplikt med tre års utsetjing.

Sætre seier at han og familien no må vurdere kva dei skal gjere vidare.

– Eg har stilt min eigedom til disposisjon for utvikling, men forvaltninga klarer ikkje å gje meg naudsynte løyve. No vert det nye rundar med papir og mindre ressursar på bygg og det som viser igjen og skapar inntekter og verdiar. Eg var ikkje nøydd til å ta over garden, men tida gjekk frå meg. Eg kunne ikkje vente lenger. Då hadde både bygga og dei kundane vi allereie har, vore vekk om eg fekk papira i orden. No tikkar klokka for meg og Olianne. Vi kjem ikkje til å stoppe, og no har vi tre år på å finne ei løysing. Vi treng ein debatt om arealforvaltning av landbrukseigedomar, om ein skal få plass til nye næringar. Kanskje trengst det nye tankar også, seier Sætre.

Då landbruksnemnda vitja han under synfaringa, fortalde han at det allereie i år vil verte om lag 600 gjestedøgn for turistar på Sætre.

Vidare har familien avtalar med andre om beiting og slått på innmarka, slik at jorda vert teken vare på. Det er planar om å byggje fem nye utleigehytter, pluss eit ei eksisterande skal verte restaurert.