På Brekke ved den nye «VØR-brua» over til Melsgjerdet landa han i morgontimane fredag ein laks på 4,1 kilo.
– Han beit på sluken på fyrste kast, så det var litt av ein start på sesongen, fortel Håvard.
Han vedgår at han var litt spent før sesongstarten på laksefisket.
– Det har vore ei svært lita elv, og vi var usikre på om laksen ville gå opp. Det har stått fisk i osen, men vi har sett lite her framme i elva, sjølv om her har vorte sett nokre, fortel Håvard.
Sjølv om han karakteriserer laksen som ei fødselsdagsgåve til seg sjølv, er det ikkje snakk om å servere han på middagsbordet laurdag.
– Nei, denne skal røykast, seier Aasen.
I Ørstaelva vart det fiska fleire laksar fredag morgon, og den største skal vere over åtte kilo.
I Bondalselva vart det landa i alle fall fem laksar i morgontimane, og ein av dei som fekk fisk var Jan Paulsen.
Tradisjonen tru fiska han i Frølandssona nedanfor Kvistadbrua. Og tradisjonen tru, fekk han fisk på fyrste dag.
– Det gjekk greitt å lande han, men no har eg naglebit, for det er kaldt i dag, fortel Paulsen.
Han også var spent på om fisken ville bite, for Bondalselva har vore svært lita i dagane før opninga.
– Men nedbøren som kom torsdag kveld og natt til fredag har gjort elva større. Sjølv om det er vanskeleg å sjå, kjem laksen opp. Og no går han i rask fart oppover i elva, seier Paulsen. Då han kom «heim» til Hjørundfjord camping viste vekta at laksen var på 4,7 kilo.
Christoffer Bjørge frå Fosnavåg var ein dei som smilte breitt på elvebarden fredag morgon. Han landa ein laks på vel fire kilo.
– Det er andre gongen eg er i Bondalselva, fortel Bjørge, godt fornøgd med fangsten.