Tove Halse Digernes frå Liadal grendelag heldt eit historisk attersyn då Liadal barnehage inviterte til storstilt feiring av sin eigen 30-årsdag. Festen vart halden på Rjånes ungdomssenter.
– Behovet for ein barnehage melde seg i starten på 80-talet. Mødrer ville ut i arbeid, men å få barnehageplass i sentrum var utenkjeleg, skildrar Digernes.
I perioden 1980–1985 vart det halde styremøte mest kvar veke. Det vart starta opp førskulegruppe på ungdomssenteret, men behovet for meir aktivitet melde seg raskt. I april 1985 godkjende kommunen at bygda tok i bruk «Fiahuset», huset etter Sofie Håvoll. Tilstanden på huset var så som så. Om vinteren måtte foreldra bytte på å kome for å fyre opp. Månadsprisen for å gå i Fialunden barnehage var 100 kroner.
– Mot dagens nær 3.000 kroner. Det var store protestar i bygda då det vart foreslått å auke prisen med 50 kroner, minnast Tove Halse Digernes.
Fialunden barnehage var i så dårleg stand at behovet for nybygg melde seg raskt. I 1995 stod eit nytt bygg på plass på Fiamarka. Bygget var kombinert skule og barnehage første tida, men i dag er det 24 barnehagebarn som har sin faste base her. På det meste har det vore 40 ungar her.
Barnehagen gjorde også ære på Kjellrun Meek. Ho har hatt Liadal barnehage som arbeidsplass i 27 år, før ho pensjonerte seg i år.
– Det har vore frykteleg kjekke år! Og ei fantastisk utvikling, frå Fiahuset, til den barnehagen vi har i dag. Eg bur like i nærleiken, så det har vore ein kort spasertur ned på jobb. Eg vil nok stille opp ved behov og høve også framover, lovar Meek.
Tove Halse Digernes viste også bilde frå dei første barnehageåra.
– Smeis kor kjekt dei har hatt det i Liadal barnehage. At dette kom på plass viser eit enormt engasjement i bygda. Det freistar å ta opp tråden i fleire saker, som til dømes gangfelt, nytt byggefelt, gatelys, fast vegdekke med meir. Måtte engasjementet bruse i bygda i mange år til, helsa Digernes til eit fullsett Rjånes ungdomssenter.
