Det har ikkje kome klager eller kommentarar frå naboar i samband med byggjeplanane om tømmerkaia som vert ei lenging austover av eksisterande kai på Ørstaterminalen.
- Eksisterande kai skal lengjast 87 meter. Dei siste 17-18 metrane av ny kai kjem utanfor regulert kailinje, seier Bjørn Brekke i Tømmerdal Consult. Det er difor søkt dispensasjon frå regulert kailinje.
- Lengda på kaia er valt ut i frå storleiken på dei skipa som skal leggje til kai. For å få ei rasjonell drift er det også viktig å ha ei lengd som gjer det mogleg å lagre tilstrekkeleg mengder tømmer på kaia, og dermed unngå å flytte tømmeret fleire gonger før lasting, seier Bjørn Brekke.
Stranda-entreprenøren K. Nordang AS skal byggje den nye tømmerkaia. I alt fem selskap kjempa om kontrakten der staten gjennom Landbruksdirektoratet har løyvd 12,5 millionar kroner. Ørsta kommune har sett av seks millionar kroner i inneverande år, og tolv millionar neste år til finansiering av kaia.
Tømmervolumet som går over kaia i dag er på 37.000 m³, og er venta å auke til 70.000 m³ i løpet av dei neste åra. Å utvikle Ørstaterminalen til tømmerkai går ut på å utvide kaifronten med 85 meter (nær ei dobling), med 6.000 m² for tømmerlagring.