I studien har NORCE-forskarane nytta seg av ein unik tidsserie, nærmare bestemt 19 år med data. Forskar og villaks-ekspert Knut Wiik Vollset har leia arbeidet med den vitskapelege artikkelen.
– Det er heilt klart uheldig at tidlegare studiar ser ut til å ha underestimert effektane lus har på villaks. Samstundes er det ein stor debatt om kor mykje lakselus reduserer bestandane, samanlikna med andre effektar som for eksempel endra sjøoverleving. No viser vi at tidlegare estimat av effektane lakselus har på villaksbestandar, har vore for lave, seier Wiik Vollset i ei pressemelding.
Lakselus påverkar utvandrande laksesmolt og reduserer kor mange vaksne laks som kjem tilbake til elvene for å gyte. Denne påverknaden er størst på Vestlandet der talet på oppdrettsanlegg er høgast.
Studien viser mellom anna at lusemiddel over tid gjer lakselusa resistent.
– Sannsynlegvis har det vore ei underestimering fordi lakselus over tid har blitt resistente mot behandlinga. I tillegg kan laksen bli delvis negativt fysiologisk påverka av medisinen, påpeiker Vollset og kollegaene.
Studien vår kan ha påverknad på kor stor vekt ein skal leggje på behandlingsstudium, legger Vollset til.
– I tillegg kan arbeidet få konsekvensar for korleis ein skal vurdere effektar av lakselus på bestandar av villaks, samanlikna med anna påverknad, seier Vollset.