Skaper farlege situasjonar dagleg

– Her er mykje hjort for tida, seier Jostein Egset, som bur ved Eksetsvingen.

Han har sjølv eit hjortetrakk forbi huset sitt.

– Dei går same råsa kvar gong, og det er mykje spor. Det er vanedyr, seier han.

Dei som bur i området er vande til hjort, men no ser det ut til at dyra har endra på vanane sine. Årsaka er truleg den nye vegløysinga, med ny sykkelsti og nye veglys mot Furene. Dermed er det meir hjort i området ved Eksetsvingen.

– Vi har alltid hatt hjort her, men det har nok blitt meir av dei no i vinter, seier Jostein Egset.

Kryssar vegen

Dagleg vert det observert hjort som kryssar vegen like før Ekstetsvingen, når ein kjem frå Ørsta, og like etter når ein kjem frå Volda. Dette betyr farlege situasjonen i trafikken. Det har vore fleire påkøyrsler av hjort her i vinter.

– Vi er kjent med problemet. Det er veldig mykje dyr som er i trekk i dette området, og har bede vegvesenet sette opp fareskilt, seier Peder Magnussen, som er viltforvaltar både i Ørsta og Volda.

– Er det nok med eit skilt?

– Det er det einaste tiltaket som er aktuelt på kort sikt. Vi veit at det er gjort forsøk med blinkande lys mellom anna i Sogn og Fjordane, men så vidt eg kjenner til er det ikkje trekt konklusjonar om korleis det fungerer.

Magnussen seier at hjortebestanden i Ørsta/Volda er stor for tida.

– Vi ønskjer å ta ned bestanden, og har signalisert at vi vil tildele fleire fellingsløyve. Det er det beste tiltaket på lengre sikt.