For 38. året på rad sender LO ut sommarpatruljane sine for å sjekke arbeidsforholda til unge sommarvikarar. Rundt 500 LO-ungdommar skal besøkje tusenvis av sommarvikarar.
I fjor hadde sju av ti mellom 15 og 24 sommarjobb, ifølgje tal frå SSB. Same året fann sommarpatruljen lovbrot på over halvparten av arbeidsplassane dei besøkte, ifølgje FriFagbevegelse.
– Like viktig som at unge får prøve seg i arbeidslivet, er det at dei får eit godt møte med arbeidslivet, slår LO-leiar Peggy Hessen Følsvik fast eit par dagar før LOs sommarpatrulje startar over heile landet.
Arbeidstilsynet melde i fjor at sju av ti kontrollerte utestadar fekk bot på grunn av brot på arbeidsmiljølova. Eit av dei vanlegaste sommarjobb-yrka er nettopp å arbeide som servitør, og det er også ein av dei bransjane der LOs sommarpatrulje pleier å finne flest brot.
LO har fem tips til unge som skal ut i sin første i sommarjobb:
* Sørg for å ha skriftleg arbeidskontrakt! Den skal fortelje deg kvar du jobbar, kor mykje du får betalt, kva jobben din er og når du skal på jobb.
* Du har krav på grundig og betalt opplæring.
* Dersom du jobbar overtid, så skal du ha overtidsbetalt.
* Bruk verneutstyr dersom jobben krev det. Det er ansvaret til sjefen å skaffe rett utstyr, men ditt ansvar å bruke det!
* Du har krav på lønnsslipp. Ta vare på den!
(©NPK)