Ingunn satsar på Din Barnehagevikar

– Vil gjere det betre for vikarane

Då Ingunn Aklestad Brautaset sjølv vart vikar i ein barnehage oppdaga ho at systemet som vert brukt til å skaffe vikarar var tungvint, og at det var frustrasjon knytt til ressursbruken. No har ho starta eige firma der målet er å gjere kvardagen betre både for vikarane og barnehagane.

Satsar: Ingunn Aklestad Brautaset satsar som gründer med verksemda Din Barnehagevikar. Den første avtalen med ein barnehage i Ørsta er no signert og Brautaset gler seg til utvikle verksemda vidare.  Foto: Joachim Åsebø

Nyheiter

Etter eit tre år langt utanlandsopphald i Sør-Korea med familien var ikkje jobbmarkanden den beste då Ingunn Aklestad Brautaset kom tilbake til Ørsta kommune og Barstadvik. Frå ein kjenning fekk ho tips om å prøve seg som vikar i ein barnehage.

– Eg hadde aldri gjort noko slikt før. Min bakgrunn var bank og kundeservice gjennom mange år. Min aller første jobb var som dagmamma, men eg tenkte aldri på at dette var eit felt eg skulle jobbe innan. Eg oppdaga manglar knytt til vikarane og tenkte at det må gå an å gjere dette betre. Det er mykje gule lappar og papir i barnehagane i dag, og ofte frustrasjon knytt til ressursbruk.