I barndomen ferierte Frikk Heide Steen, son av den kjende komikaren Harald Heide Steen jr, ofte i Follestaddalen.
Torsdag 23. november tek dirigenten i Sølvguttene turen til Volda kyrkje for å halde julekonsert med eit kor som tel 60 songarar, barn, unge og vaksne.
– Eg skulle jo gjerne hatt konserten i Ørsta kyrkje, men når kyrkja i Volda er ein del større, held vi konserten der. Men eg håper mange ørstingar tek turen, seier Frikk Heide Steen.
Øyehaug
Han er godt kjend på våre kantar fordi mora Gullen Øyehaug kjem frå Ørsta.
– Eg har vore ein del på ferie i Follestadalen på garden til morfar min Olav Øyehaug. Garden heiter Øyheim. Vi ferierte også i hytta til mamma i Follestaddalen, fortel Heide Steen jr.
Han er både dirigent og dagleg leiar i Sølvguttene, eit kor mange nok har eit forhold til, ikkje minst i jula.
Stemning
Heide Steen lovar ein stemningsfull konsert.
– Er det nokon som kan lage julestemning, så er det Sølvguttene. Vi serverer kjende og kjære songar, ja, alt ein kan ønske seg når ein høyrer Sølvguttene, seier Heide Steen.
35-åringen har sunge i Sølvguttene sidan han var åtte år.
– Pappa song også i Sølvguttene, og vi delte interessa for musikk og storband, spesielt jazz, fortel Heide Steen.
Koret skal på Sunnmøre også halde konsert i Ulsteinvik og i Ålesund.
Frå 16. november til veslejulaftan skal Sølvguttene halde heile 75 konsertar.
– Så det vert ganske «heavy» for dei unge korsongarane, smiler Frikk Heide Steen.
Billettar til konserten i Volda kyrkje kan folk kjøpe på nettstaden solvguttene.no