Torsdag opnar Volda og Ørsta kunstlag salsutstilling på Spinneriet i Volda.
Her kan publikum sikre seg kvalitetskunst til ein grei pris – kunst av mellom andre Raymond Klæbo, Astri Eidseth Rygh, Sylvi Aambø, Rasmus Aarflot Riste, Simon Flem Devold, Tove Strømme og Ørnulf Opdahl og Kari Barstad.
Volda kunstlag vart oppretta i 1937, medan Ørsta kunstlag vart skipa i 1941.
I 2013 vart dei to laga slått saman til Volda og Ørsta Kunstlag. Frå starten av var det vanleg at kunstlaga kjøpte eitt verk ved kvar utstilling som vart arrangert, og i løpet av åra har det blitt mange flotte verk i ulike stilar og teknikkar av både lokalt og nasjonalt kjende kunstnarar, melder kunstlaget i ei pressemelding.
Kunsten har vore lagra i Volda og Ørsta. No hentar Volda og Ørsta kunstlag deler av denne kunstskatten fram i lyset igjen. Mellom 45 og 50 bilde blir lagt ut for sal, og vi håper at mange skal finne vegen til private heimar i regionen, heiter det i pressemeldinga.
Salsutstillinga varer frå torsdag til laurdag.