Det melder Nynorsk kultursentrum i ei pressemelding.
– Eg er stolt og glad over at eg skal få vere festspeldiktar under Den nynorske festspela neste år. Det er ikkje så mange festivalar som har slike "verv", det gjer det jo endå meir stas. Dessutan er eg i flott selskap - det er mange eminente folk på lista før meg, seier Lillegraven sjølv. Ho fortel at ho har inntrykk av at det blir ein del ulike oppdrag, med mange høve til å møte publikum og lesarar, og kanskje også få framheve nokre andre forfattarar ho sjølv set høgt.
Lillegraven er lyrikar, kjent for vakre og gjenkjennelege bilete i eit enkelt, men verknadsfullt språk. Ho debuterte i 2005 med Store stygge dikt. Seinare har Lillegraven gitt ut romanen Mellom oss (2011), som er ei episk slektshistorie, og diktsamlingane Urd (2013) og Manilahallen (2014). I 2012 fekk Lillegraven pris frå Alfred Andersson-Ryssts fond. Året etter fekk ho Brageprisen for Urd. For same boka fekk ho òg Bokbloggarprisen i 2014. Lillegraven har også omsett dikt, skrive fleire barnebøker og samarbeidd med ulike musikarar og kunstnarar.
–Vi har følgt Lillegraven heilt sidan debuten, og ser fram til at ho skal få setje sitt preg på neste års festspel. Med Lillegraven som festspeldiktar får vi også eit godt høve til å løfte fram lyrikken som ein levande og aktuell sjanger, seier programansvarleg for Dei nynorske festspela, Åshild Widerøe.
Dei nynorske festspela blir arrangert i Ivar Aasen-tunet og andre stader i Ørsta og Volda 23. – 26. juni.
Festspeldiktarar 1994–2016
1994 Kjartan Fløgstad
1995 Halldis Moren Vesaas
1996 Paal-Helge Haugen
1997 Ragnar Hovland
1998 Jon Fosse
1999 Åse-Marie Nesse
2000 Rune Belsvik
2001 Brit Bildøen
2002 Einar Økland
2003 Marie Takvam
2004 Frode Grytten
2005 Edvard Hoem
2006 Olaug Nilssen
2007 Erna Osland
2008 Lars Amund Vaage
2009 Tove Bakke
2010 Rønnaug Kleiva
2011 Bjørn Sortland
2012 Arne Moslåtten
2013 Guri Sørumgård Botheim, Sigrid Sørumgård Botheim og Lars Petter Sveen
2014 Agnes Ravatn
2015 Gunnhild Øyehaug
2016 Ruth Lillegraven