Dei lokale laga frå Ørsta og Volda har levert gode prestasjonar under DanaCup i år. J16-laget til Volda er klar for B-finale.

I G17-klassa vann Volda/Ørsta 1 gruppa si suverent, og hadde ein målforskjell på 20–1. Danske Blokhus vart slått 4–0 i 16.-delsfinalen i a-sluttspelet torsdag morgon, og gjekk fortent vidare til 8.-delsfinale. Der venta det brasilianske laget Interclubes. Volda/Ørsta 1 leverte flott spel og vann kampen 4–1 etter tre skåringar av Stian Finnøy og eitt av Torstein Koppen.

Laget var dermed klar for kvartfinale mot meksikanske Club America, og den tredje kampen for dagen. Kvartfinalen vart ein halvtime forsinka, og då kampen kom i gang var det meksikanarane som tok føringa i kampen. Dei vart redusert til 10 mann, og frå straffemerket utlikna Per Ole Egset for Volda/Ørsta 1. Sjølv med ein spelar mindre på bana var det meksikanarane som var mest effektive framfor mål. Dei tok leiinga igjen, og auka seinare til både 3–1 og 4–1. Dermed var DanaCup over for Volda/Ørsta 1, men laget kjempa godt mot sterk motstand frå Mexico.

Til b-sluttspel

For Volda/Ørsta 2 vart det uavgjort 0–0 i første kamp mot danske Tarup Paarup tysdag. Onsdag vart det 0-3-tap mot norske Driv. I siste kamp mot skotske Clachnacuddin onsdag ettermiddag vart det 0-2-tap. Volda/Ørsta 2 var dermed klare for b-sluttspel, og møtte Fitjar i 16.-delsfinalen. Kampen enda med 2-0-siger for Fitjar.

Rauk i 32.-delsfinale

G16-laget til Ørsta tok seg b-sluttspelet etter ein uavgjort, og tre tap i gruppespelet. To av tapa var eittmålstap. Malvik venta i 32.-delsfinalen. Dessverre for Ørsta-gutane vann Malvik kampen 2–1.

Tok seg til a-sluttspel

Volda og Ørsta hadde også samarbeidslag i G15-klassa. Mot Trauma tysdag vart det 3-0-siger. I andre kamp vart det uavgjort 2–2 mot London Athletic. Siste kamp i gruppespelet var mot svenske Vendelsö. Den enda uavgjort 1-1, og med andreplass i gruppa var laget klar for 32.-delsfinale i a-sluttspelet. Motstandar var tyske Olfen SuS. Volda/Ørsta tok føringa i kampen, og fekk også tildelt straffespark. Det vart dessverre bom, og det tyske laget kom tilbake og utlikna. Seinare i kampen tok tyskarane leiinga, og vann kampen 2–1.

Ørsta rauk mot Sandefjord

Ørsta sitt G14-lag opna med 1-5-tap mot Forus & Gausel tysdag. Seinare same dag vart det 3-2-siger mot polske Boruta Zgierz. Nannestad var motstandar i siste kamp i gruppespelet onsdag ettermiddag. Før kampen låg Ørsta godt an til avansement med ein andreplass i gruppa, og med 4-0-siger tok Ørsta seg til a-sluttspelet. Sandefjord var motstandar i 32.-delsfinalen torsdag. Det vart ein målrik kamp som Sandefjord til slutt vann 4–3.

Volda-jentene til kvartfinale

J14-laget til Volda fekk tøff motstand i gruppespelet, men tok seg til b-sluttspel. Der møtte dei danske Fortuna Hjørring i 16.-delsfinalen torsdag. Volda-jentene kunne då endeleg juble for siger at det danske laget vart slått 1–0. I 8.-delsfinalen vart det meir jubel med 2–1 siger over Bønes. Tyske Stade venta i kvartfinalen fredag morgon. Det tyske laget vart for sterke for Volda-jentene, og vann kampen 2–0.

Semifinale for J16

Tøff motstand vart det også for J16-laget til Volda i gruppespelet, men laget gjekk til b-sluttspel. J16-laget møtte svenske Skara i 16.-delsfinalen i b-sluttspelet torsdag, og vann kampen 2–1. 8.-delsfinalen mot Trott måtte avgjerast på straffespark etter at kampen enda 1–1. Volda-jentene tok seg vidare etter 6–5 samanlagt. I kvartfinalen var Volda klart betre enn Holmen, og vann med solide 7–0. Dermed er Volda-jentene klare for semifinale i b-sluttspelet. Kampen mot norske Moi vann Volda 2-1, og finalen vert spelt laurdag morgon.