Ørsta fekk årets første siger heime mot Åram/VanKam førre veke. Torsdag var det hardtsatsande og nyopprykka Emblem som var motstandar på bortebane. Bortelaget fekk ein god start på kampen, og Eskild Dagfinrud sendte bortelaget i føringa allereie etter to minutt. Det var ikkje lenge Ørsta var i leiinga, og berre minutt seinare kom Marcus Steffensen aleine med målvakt Martin Liaskar og laga var like langt. Begge lag var angrepsvillige, og det vart skapte store sjansar begge vegar. Både Anders Molnes og Terje Rebbestad var nære på for Ørsta, og Dagfinrud hadde også ei heading som gjekk rett utanfor. Fem minutt før pause var Molnes frampå igjen for Ørsta, men avslutninga gjekk i stolpen. Emblem var heller ikkje ufarlege i omgangen, og laga skapte omtrent like mange sjansar. Likevel vart det ikkje fleire mål i førsteomgang, og laga gjekk til pause på stillinga 1–1.

Brekke-skåring

Kampbilete frå førsteomgang heldt fram i andre. Emblem skapte den første store sjansen allereie etter eitt minutt, men Liaskar ordna opp. Minuttet seinare var Rebbestad frampå, men avslutning gjekk utanfor. Etter 69 minutt fekk endeleg Ørsta teljande resultat. Sjur Haug spelte gjennom Rebbestad på kanten, og på innlegget sette Jan Marius Brekke ballen i mål. Åtte minutt seinare fekk Ørsta sjansen til å avgjere kampen, men skotet frå Jørgen Winjevoll vart blokkert. Nokre minutt seinare vart ein Emblem-spelar felt på hjørnet av 16-meteren, og dommaren dømde straffespark. Tidlegare Volda- og Sæbø-spelar Remi Eggesbø var sikker frå straffemerket, og laga var like langt igjen. Begge laga skapte kvar sin store sjanse på overtid, men det var ikkje fleire mål og laga fekk med seg eitt poeng kvar.

– Kunne fått med oss noko meir

– Eg er kanskje meir nøgd med kampen enn med resultatet. Eg synest at vi byrjar å likne på noko, og vi kunne godt å fått med meir enn eitt poeng frå denne kampen. Kampen stod å bikka ei stund på 1–1. Då vi fekk 2–1 trudde eg at vi skulle drage det i land. Det kunne også vorte blåst frispark som straffespark for Emblem, og vi burde også gått opp i 3-1, seier trenar Henning Nygård.

Ørsta har fem poeng på sine fire første kampar, og ligg på åttandeplass for augneblinken. Avstanden opp til Rollon på førsteplass er fem poeng.

– For så vidt er eitt poeng greitt ut frå kampbilete. No har vi hatt tre kampar der vi kunne fått med oss noko meir om vi hadde hatt litt marginar og avgjerder med oss. Vi får satse på at det jamnar seg ut over sesongen.

– Er meir på hogget

Nygård er nøgd med at Ørsta står kampen ut mot Emblem.

–Eg synest at vi har vore litt meir på hogget, og vi held kampen ut på ein skikkeleg måte mot Emblem. Jan Marius Brekke var m.a. solid, og den som utmerkte seg spesielt for oss, seier Nygård.

Kommande onsdag gjestar Godøy Ørsta stadion.