Strindheim leverte ein god sesong i andredivisjon, og vann si avdeling etter 18 sigrar og to tap på sine tjue kampar. Før kommande sesong er dei på jakt etter ny hovudtrenar, og i førre veke tok dei kontakt med Ørsta-trenar Björgvin Runarsson. Trenaren frå Island kom til Ørsta for rundt eit år sidan, og signerte ei toårskontrakt med klubben her.

– For meg er det ein «boost» å få eit tilbod frå ein stor klubb som Strindheim. Eg har takka nei til jobbtilbodet. Eg veit ikkje heilt kva som skjer med Ørsta enno, og vi får sjå kva som skjer. Men eg er Ørsta-trenar no, seier Runarsson.

Avtale med Ørsta

Strindheim ville ha Runarsson som hovudtrenar for førstelaget, i tillegg til at han skulle assistere andrelaget. Partane hadde tre samtaler saman, men Runarsson valde til slutt å takke nei til tilbodet.

– Gjennom det siste året har eg og Ørsta snakka saman rundt denne problemstillinga, og viss eg skulle få eit tilbod frå lag i høgare divisjonar så ville ikkje Ørsta seie nei.

Ørsta handball vart tidleg informasjon om førespurnaden frå Strindheim, og gav Runarsson løyve til snakke med førstedivisjonslaget.

Samarbeid

Ørsta leverte ein god sesong i tredjedivisjon, men Runarsson er klar på at dei må verte enno betre.

– Det er mykje vi må gjere i Ørsta viss vi vil verte betre, og spelarane må også ha den rette innstillinga og lysta. Eg vil gjerne sjå Ørsta, Volda og Bergsøy jobbe saman for å skape eit sterkt herrelag saman. I tillegg til å jobbe saman rundt dei yngre avdelingane i klubbane. Volda og Ørsta gjer dette på fotballsida no, og eg tykkjer det er bra og vegen å gå, seier Runarsson.

Runarsson har eitt år igjen av kontrakten med Ørsta, og onsdag skal han i møte med klubben.

– Eg håper på det beste for alle partar, men eg må også tenke på meg sjølv med jobb og meir til.