Ørsta og Godøy stod med fem poeng kvar på fire kampar før oppgjeret på Ørsta stadion onsdag. Medan Ørsta leverte ein god prestasjon i 2–2 kampen mot Emblem i førre serierunde, kom Godøy frå ein solid 4–1 siger over Åram/VanKam på heimebane. Ørsta opna kampen best, og hadde ballen mykje i laget utan at det vart skapt dei store sjansane. Ti minutt ut i kampen kom det eit oppspel frå Robert Steinnes som Anders Molnes tok ned. Han fekk vende opp og sendte ballen i mål nede ved stolpen. 1–0 Ørsta. Ti minutt seinare fekk heimelaget bra fart i ballen, og den enda med Jan Marius Brekke på høgresida. Han runda stopparen til Godøy, og fann Jørgen Winjevoll framfor mål som enkelt sette inn 2–0. Bortelaget fekk sin første sjansen i kampen eit par minutt etter skåringa, men skotet gjekk via ein Ørsta-spelar og til hjørnespark. Resten av omgangen var jamspelt, og ingen av laga klarte å kome til dei store sjansane. Dermed gjekk laga til pause på stillinga 2–0 til Ørsta.

Store rom

Starten på andreomgang byrja med stillingskrig på midtbana mellom laga. Bortelaget måtte framover på bana om dei skulle få med seg noko frå denne kampen, og det gav Ørsta store rom. Etter 65 minutt vart Molnes spelt gjennom, og han runda målvakta og sette enkelt inn 3–0. Ti minutt før slutt sette Preben Alexander Olsen fart mot stopparane til Godøy, og vippa ballen gjennom til Brekke. Spissen vippa ballen over ein utrusande målvakt, og 4–0 til Ørsta. På overtid reduserte Sven Harald Nyvoll for Godøy. 4–1 sigeren over Godøy var Ørsta sin andre strake siger på heimebane.

– Held betre nivå no enn tidlegare

Etter kampen mot Emblem sa trenar Henning Nygård at Ørsta byrja å likne på noko, men han er ikkje heilt sikker på om prestasjonen mot Godøy var eit nytt steg i riktig retning.

– Om det er eit nytt steg veit eg ikkje, men held betre nivå no enn tidlegare. Eg synest kanskje at prestasjonen mot Emblem var vel så god som no. Vi er litt meir effektive framfor mål. Det pregar oss positivt, og gjev laget ekstra energi. Eg synest vi fell litt tilbake til gamle synder med å stresse litt i periodar, men alt i alt var det bra gjennomført. Vi er trygge bakover på bana, og framover på bana har vi såpass mange gode ferdigheiter. Vi skaper bra med sjansar, og det er ein fortent siger. Det er greitt at Godøy får eit mål for 4–0 var kanskje litt mykje.

Mange fekk sjansen

Med sigeren sikra i andreomgang fekk fleire spelarar sjansen til å ta del i kampen, og Ørsta gjorde seks bytter i andreomgang.

– Det er kjekt å få ein såpass solid kamp, og at vi fekk gjere mange bytter. Dei som ikkje har fått så mykje speletid fekk sjansen, og det er kjekt å la dei få smake litt på kampspel, seier Nygård.

På dei fem første kampane denne sesongen står Ørsta med to sigrar, to uavgjort og eit tap. Dette er Nygård bruktbart nøgd med.

– Vi kunne kanskje avgjort jamne kampar til vår fordel, men samanliknar ein med same tid i fjor så er det betre. Vi får håpe at vi held fram i same stimen som vi har hatt i dei siste kampane.

Med tre poeng klatra Ørsta på tabellen, og neste kamp er borte mot Blindheim kommande torsdag.