Etter tapet mot Rollon i slutten av april har Ørsta hatt ein god periode med to sigrar og ein uavgjort kamp. Torsdag tok laget turen til Blindheim som var på jakt etter ein opptur etter tre strake tap mot Rollon, Norborg og Emblem.

Uavgjort til pause

Heimelaget var nær ved å sjokkopne allereie etter eitt minutt, men Ørsta slapp med strekken. Etter dette tok bortelaget over føringa i kampen. Ti minutt ut i kampen kom Terje Rebbestad seg rundt på kanten. Jan Marius Brekke fekk avslutta, og Anders Molnes sette inn returen. Målet vart ikkje teljande då dommaren blåste av for offside. To minutt seinare avslutta Sjur Haug frå 18 meter, og ballen gjekk like utanfor. Etter 18 minutt kom Rebbestad på ny til innlegg, og Brekke var nær ved å sende Ørsta i føringa.

Fire minutt seinare fekk bortelaget frispark frå om lag 25 meter. Molnes tok fart og banka det i mål via tverrliggjaren, og 1–0 til Ørsta. Målet til Ørsta såg ut til å gje Blindheim litt ekstra energi etter ei dårleg periode. Fire minutt etter skåringa kom deg seg gjennom midten, og Fredrik Giske utlikna. Heimelaget var på offensiven i siste del av førsteomgang, og skapte to gode sjansar som ikkje gav teljande resultat. Dermed gjekk laga til pause på stillinga 1-1, og med betre utteljing kunne Ørsta ha vore i leiinga.

Tidleg mål imot

Andreomgang starta med dårleg kommunikasjon på eit hjørnespark imot etter tre minutt. Sondre Follesø fekk gå opp uhindra på fem meter, og sendte Blindheim i føringa. Heimelaget hadde ein god periode etter skåringa, og var det laget som ville mest. Ein god Martin Liaskar i Ørsta-målet hindra fleire mål imot. Bortelaget hang godt med spelemessig, men klarte ikkje å skape dei store sjansane før i siste halvdel av omgangen. Etter 70 minutt var Rebbestad ein dårleg treff frå utlikning, og både Simen Skuseth og Eskild Dagfinrud var nær utlikning på tampen av kampen. Blindheim fekk to kontringar som dei nytta etter 89. og 90. minutt, og Tom Erik Olsbø sette begge i mål. Med 4–1-siger kunne Blindheim juble etter kampen på ein dag der Ørsta var under pari.