Sæbø var store favorittar i oppgjer mot Kvamsøy/ÅVK laurdag. Sande-laget hadde tapt sine to første kampar mot Gjerdsvika/Moltustranda og Larsnes/Gursken 2, medan Sæbø stod med to sigrar og eitt tap på sine tre første kampar.

Haugvoll stadion er inga enkel bane å reise til, men heimelaget kunne vise ei plettfri grasbane til årets første heimekamp. Det vart litt stillingskrig mellom laga i opninga før kampen fekk sett seg, og Sæbø tok meir og meir over kommandoen i kampen.

Kristian Straume vart spelt gjennom litt ut i omgangen. Avslutninga gav målvakt retur på, og på forsøk nummer sette Straume ballen i mål via ein forsvarsspelar. Heimelaget slo raskt tilbake. Etter litt sløvt forsvarsspel frå Sæbø si side utlikna Kvamsøy/ÅVK på ein dødball. Straume sendte Sæbø i føringa på nytt.

Rett før pause fekk Jakob Hauge Moe ballen i beina etter ei klarering, og sette ballen i mål.

6–1 siger

I pausen bestemte bortelaget for å halde trykket oppe i andre omgang, og punktere kampen så tidleg som råd. Ti minutt ut i omgangen fekk Sæbø tildelt straffespark, og Bjørnar Holen skåra sikkert. På dette tidspunktet var kampen avgjort. Sæbø heldt fram med å skape sjansar, men vart mindre nøyaktige i spelet sitt. Mot tampen av kampen fekk Tommy Riise Olsen eit kanontreff frå rundt tjue meter, og sendte ballen heilt opp i vinkelen. Etter rapportane var kommentaren frå far Oddvar Olsen at dette hadde sonen trent på i mange år, og at det var på tide at han trefte. Litt seinare fyrte Mikkel Riise av frå rundt 16 meter, og fastsette resultatet til 6–1 i favør Sæbø.

– Kunne ha vorte meir

Frå sidelina kunne spelande trenar Terje Hauge Øye konstatere at Sæbø innfridde forventningane, men sigeren kunne ha vorte større.

– Eg følte at det tok litt tid før kampen fekk sett seg. Vi håpte at vi skulle styre og dominere frå start, men det kom seg etter kvart. Dette var første seriekamp for heimelaget, og dei var ivrige og på hogget. Endå ein gong produserer vi mykje i begge omgangane. Vi skåra tre mål i kvar omgang, men det kunne fort ha vorte meir. Vi har skåra 5, 6 og 7 mål i kampane vi har skåra i, og vi kan ikkje klage på det.

– Litt å pirke på før møtet med Hareid 2

Trenarduoen Haugen Øye og Yngve Frøland var nøgde med det Sæbø presterte mot Kvamsøy/ÅVK, og håper at laget viser dei same taktene mot Hareid 2 kommande måndag.

– Dette var ein kamp som vi skulle og måtte vinne, og det gjer vi. Vi gjennomførte profesjonelt. Vi gjer jobben vår, skaper sjansar og slepp ikkje til motstandarane til all verda av sjansar. Det er meir enn godkjent frå vår side, men det er framleis ting som vi må pirke på til neste kamp mot Hareid 2. Klarer vi å halde oppe trøkket og sette sjansane i denne kampen er det gode sjansar for nye tre poeng, seier Haugen Øye.