Det seier Solveig Storeide som er dagleg leiar for Volda TI Fotball. Ho snakkar om Kvivsvegen. Til årets store «happening», Kiwi Hall-cup 8.-10. april, kjem det lag både frå Førde, Stryn og Hornindal, i tillegg til alle dei lokale. Også bylag frå Spjelkavik, Blindheim og Herd kjem. Og lag frå Ytre har også meldt si interesse.

– Vi er ein av dei største cupane i området. Ørsta og Volda samarbeider om dette, det gjer at vi kan slå skikkeleg på stortromma, seier Arnstein Sandvik, dagleg leiar i Ørsta IL Fotball.

Fullt

Det er niande gongen at cupen vert arrangert, og deltakartalet berre aukar.

– I fjor hadde vi mellom 150 og 160 lag i aksjon. Då var det fullt, fortel Sandvik.

Fullt vert det også i år, og det at dei to klubbane samarbeider gjer at dei har større flater å spele på. Det vert dermed cupspel både i Kiwi-hallen i Ørsta og i Mørehallen i Volda. Aldersspennet går frå seks år til 14 år.

– Hallane vert fylt opp. Det at vi har fått desse hallane gjer at vi kan tilby fotballspel også på vinterstid. Det er veldig kjekt, seier Storeide.

– Og så må vi få legge inn litt ros til alle foreldra som stiller opp. Utan dei, ingen cup, seier Sandvik.

Sponsor

Det er Kiwi som er stolt sponsor av cupen. Alle dei fire butikkane i Ørsta og Volda står bak.

– Barn og unge er eit satsingsområde for oss, og vi er veldig glade for å få vere med. Frukt og grønt og aktive unge høyrer saman, seier Arne Johan Rebbestad frå Kiwi Vallabøen.

Arrangørane lovar at helga skal handle om meir enn berre fotball.

– Vi legg opp til ei aktivitetshelg for heile familien. Her kan både søsken og foreldre og besteforeldre vere med. Mellom anna vert det hoppeslott. Få med bestefar i hoppeslottet, seier Solveig Storeide lattermildt.På kveldstid vert det arrangert cupdisko. Dette vert ope også for born som ikkje er aktive i fotballen.

– Eg vil også oppmode næringslivet til å hoppe på denne helga og tilby sine aktivitetar. Det kjem utruleg mykje folk til bygdene våre, seier Arne Johan Rebbestad.

<strong>Leiarar:</strong> Ørsta og Volda samarbeider om Kiwi-cupen. Arnstein Sandvik og Solveig Storeide er daglege leiarar i kvar sin klubb.