Åmdal var store favorittar på førehand. Bortelaget stod med to tap og 0–17 i målforskjell før møtet på Legene, og dei siste sesongane har Åheim slite med å sanke poeng i Ørsta kommune. Heimelaget tok kommandoen i kampen frå start, og spelande trenar Svein Erik Grevsnes sendte Åmdal i føringa frå straffemerket. Simon Gjøen dobla leiinga litt seinare før han sette inn sitt andre mål for dagen til 3–0. Tjue minutt ut i kampen var det Kristian Sirnes sin tur til å kome på skåringslista, og allereie på dette tidspunktet i kampen såg det ut til å verte stygge siffer for Åheim sin del. Bortelaget fekk også ein mann utvist, men intensiteten i spelet dabba av for Åmdal sin del etter dette. Laga gjekk til pause på stillinga 4-0.

Gjøen med tre mål

I andreomgang fann Åmdal igjen vegen til mål. Andre Følsvik ordna 5–0 leiing, og Kai Robin Myklebust teikna seg også på skåringslista litt seinare. Ole Martin Korsnes sendte Åmdal opp i ei 7–0 leiing på eit frispark, før Sirnes også sette inn eit frispark til 8–0. Gjøen fekk æra av å avslutte skåringsballet med sitt tredje mål for dagen, og fastsette sluttresultatet til 9–0. Heimelaget skapte også mange sjansar i andreomgang som ikkje resulterte i mål.

– Forventa at vi skulle vinne

Åmdal står no med seks poeng på tre kampar, og har fått ein god start på årets sesong i femtedivisjon.

– Dette var ein kamp som eg forventa at vi skulle vinne, men det skal også gjerast. Kampar der ein skal vere betre enn motstandarane er som regel dei verste for Åmdal, men vi var i leiinga 4–0 allereie etter tjue minutt, seier Grevsnes.

Den spelande trenaren var også nøgd med det laget viste på bana.

– Vi hadde mange sjansar, og eg tykkjer at det jamt over var ein god laginnsats der mange kjem på skåringslista. Med dei motstandarane vi har hatt så langt så tenkjer eg at det er greitt å ha seks poeng, og eg ville ha sagt ja til dette på førehand av sesongen. Tabellen viser at vi ligg på tredjeplass, men det er jamt og alle slår alle. Vi tek med oss ein god porsjon sjølvtillit til oppgjeret mot Langevåg på bortebane 16. mai, seier Grevsnes.

Mot Åheim fekk også Andre Dvergsdal sin debut for Åmdal. Han er henta på lån frå Ørsta.