Andrine Hjellen Haugland (J18/19) tok gull i spydkast på Veidekkeleikane på Lillehammer. Andrine stadfesta igjen at ho er i storform då ho kasta 600 grams-spydet 45,15 meter. Kastet ga 1029 Tyrving-poeng. Andrine har no teke heim siger på to av dei største friidrettsstemna i landet Framoleikane og Veidekkeleikane. Ho er den som har kasta spydet lengst i landet i sin årsklasse i år.
Ørsta IL friidrett tok til saman fem medaljar på stemnet. Sigrid Vartdal (J17) tok sølvmedaljen på 200 m med tida 26,79. Elias Hovden Nilsen (G17) tok sølv i spyd under vanskelege vindforhold. Åse Øyehaug (J17) sprang inn til bronse på 400 m. Thea Nilsen (J13) tok sølv i spyd med 22,36 m. Amalie Tomasgard (J16) sprang sin beste 800 m nokon gong og tok 4. plass med tida 2,26,67. To talent som blir spennande å følge med framover er søskena Oskar (G11) og Maria Mjelva Straume (J13). Dei er allsidige og set stadig nye persar. Oskar tok seg til A-finalen på 60 m og vart nr 5 med tida 9,13. Maria forbetra seg med heile ni sekund på 600 meter då ho sprang inn på 1,56,84.
Ørsta IL friidrett stilte med 12 utøvarar i alderen 11-19 år. Utøvarane imponerte med stor innsats, mange personlege rekordar og deltaking i mange øvingar. Vi nemner berre nokre av resultata her.
Hanna Hoggen Gjærset (J16) sprang godt på 100 m og 200 m. På 100 m sprang ho på 13,56 og sette ny pers. Ho er no like ved å klare UM-kravet på 100 m.
Filip Hoggen (G14) er allsidig og var med i mange øvingar. Han tok m.a. 4. plass på 800 m.
Mari Øyehaug (J12) var like ved pers på både 60 m og i lengde. Tiril Tomasgard (J11) sette pers i spyd.
Ørsta IL friidrett har lang tradisjon med deltaking på dette stemnet. Med over 750 utøvarar på det 41. Veidekkeleikane er dette det nest største banestemnet i friidrett i landet. Veidekkeleikane vart arrangert på Stampesletta på Lillehammer.