Etter dei fem første serierundane stod Ørsta med tre sigrar og to tap. Mellom anna hadde Ørsta-damene slått Emblem 7–0 på heimebane og det vart 8-2-siger mot MSIL. Torsdag kveld gjesta Stranda/Sunnylven kunstgrasbana i Ørsta. Gjestene hadde vunne to av sine seks første kampar, og det låg an til å bli ein jamn kamp mellom laga. Då kampen var fem minutt gammal tok bortelaget leiinga etter eit hjørnespark. Mari Ørstavik var nær utlikning to minutt seinare, men då kampen var ti minutt gammal hadde Stranda/Sunnylven dobla leiinga. På eit langt oppspel gav ikkje Kaja Rekkedal seg, og ho stonga inn reduseringa etter 12 minutt.
Ørsta hadde initiativet i kampen, men det vart ikkje skapt så mange sjansar utover i omgangen. Mot spelets gang auka gjestene leiinga til 3–1 då det var spelt ein halvtime. To minutt seinare stod det 4–1 då Ørsta-forsvaret ikkje hang heilt saman. Ti minutt før pause jaga Rekkedal eit utspel frå Hanne Camilla Osborg Kvammen. Ingen var bort i ballen som trilla i mål til slutt, og målvakta reduserte.
Tre minutt seinare slo Rekkedal inn eit frispark frå venstre. Ballen gjekk rett i mål og det var igjen kamp att på Ørsta stadion.
Etter kvilen var Kine Strande nær på eit langskot og Rekkedal var nær sitt tredje mål i kampen.
Elleve minutt ut i omgangen vann kaptein Mariell Boska Husevåg duellen på bakarste stolpe og det var igjen likt mellom laga, 4–4.
Ørsta styrte det meste av banespelet i 2. omgang og det låg ei skåring i lufta. Rekkedal skapte mykje problem for forsvaret til Stranda/Sunnylven, men målvakta til gjestene stoppa forsøka til spissen. Eit kvarter før slutt fekk Strande godt treff utanfor 16-meteren og sende Ørsta i føringa 5–4.
Ørsta hadde fleire sjansar til å auke leiinga, men det vart ikkje fleire mål. Dermed kunne Ørsta-damene fortent ta sigersropet etter årets fjerde siger i 4. divisjon.
– Her er mykje entusiasme og det betyr litt å få vinne fotballkampar. For vår så tel vi ikkje poeng, men dei gode opplevingane. Det er alltid kjekt å vinne tette fotballkampar, og i dag var det ein herleg siger, seier Kjell Einar Dagfinrud som trenar damelaget saman med Rune Johnsen.
Søndag er Stordal motstandar på bortebane for Ørsta.