Kjære DU som bur i den vakre kommunen vår og som er stolt over dei majestetiske fjella, dei flotte fjordane, den unike naturen og dei engasjerte menneska som bur her. Det er heilt sikkert ikkje DU som har kasta alt dette rotet og forsøpla skråninga rett utom Rjånessvingen, Kattavika.

Eg kan ikkje tenkje meg at det er DU som har kasta GAMLE DATASKJERMAR, ELEKTRISK VIFTE, MIKROOMN, TOAST-JERN, PANELOMNAR, TV-SKJERMAR, BILDEKK, KONTORSTOLAR, DUKKEVOGNER, BARNEVOGNER, SYKLAR, SYKKELHJUL, STØVSUGARAR, PARASOLL, PLASTKASSER, PYNTESTATIV TIL KUBBELYS OG SVÆRT MYKJE ANNA SKROT OG SKRAML.

Eg veit ikkje KVEN det er som har kasta dette, men vedkomande har mest truleg kasta dømmeevne, samvit og hjartet sitt utfor skrenten i lag med alt skrotet. Eg trudde ikkje at folk gjorde slikt lenger. At dei visste betre.

Men eg veit KVEN som har rydda opp alt. KVEN som har gått opp og ned den stupbratte skråninga og vegen ned til sjøen eit utal gongar og kjempa med seg alt skrotet opp bakkane. Eg veit at DU gjorde dette fordi DU bryr deg. Fordi DU ynskjer å gjere ein innsats for miljøet og alle som bur her. Eg tippar at ingen har bedt deg om å gjere dette. Det er ikkje første gongen DU har gjort slikt arbeid. Du er observert andre stadar óg.

Eg veit kven DU er, men eg veit ikkje kva DU heiter. Eg skal nok stoppe DEG neste gong eg ser DEG og TAKKE DEG for jobben du har gjort. Eg skal takke DEG av heile mitt hjarte.

Og til DEG som har tatt DEG tid til å ordne med bil og hengar for å samle opp alt skrotet DITT, mest truleg ein sein kveld så ingen skulle sjå DEG, for så å køyre det ut/inn til Kattavika og ikkje til VØR: DU BURDE SKAMME DEG LITT. Slik forsøpling er IKKJE greit. Eg veit at Kattavika var ein mykje nytta dumpingplass for søppel før i tida, men du må ikkje tru at dette er gammalt skrot. Mykje av det som stod der var verken vått, skite eller prega av tidens tann.

No kjem snart VØR og hentar skrotet. Heilt sikkert fordi DU som rydda ringte dei og sa at dei måtte kome. Skrotet er snart ute sv syne og ute av sinn, men vårt etiske og moralske ansvar overfor miljøet må vi aldri gløyme.

Engasjert ryddar

Tove Halse Digernes har funne ut at personen som har rydda opp i rotet er Per Inge Rebbestad. Han har Møre-Nytt skrive om ved fleire andre høve, i samband med at han driv privat ryddedugnad over heile kommunen.

- Ørsta kommune kan ikkje vere prisgitt at eldsjeler som Rebbestad ryddar opp! kommenterer Tove Halse Digernes.

Kva som skal få folk til å slutte å forsøple naturen, er ho klar på:

- Eg tur ein må appelere til folk sitt samvit, ein må vere tydelege på at slik forsøpling er ulovleg, at det kan gjere stor skade på fuglar og dyr. Eller kanskje ein kan gjere som Vanylven, der det er 100 prosent gratis å levere alt avfall på grovafallsplassen. Dei seier det er sponsa igjennom renovasjonsordninga. Først då får ein nok vesentlig slutt på slikt tull. Kanskje har ikkje dei som kasta frå seg søppel her vore klar over VØR sine gode ordningar for mottak av skrot? Mykje av det som låg der ute er det gratis å levere.