6. juni vert den sjølvtitulerte «Monsiaden» arrangert på Eidsåvoll i Vanylven for syttande år på rad.

Eindagsfestivalen er ei hending som tek sikte på å gje alle utviklingshindra på Sunnmøre ein minneverdig start på sommaren, med både aktivitetar og musikalske innslag.

– Merkesteinane kjem sjølvsagt! Elles skal vi både spele fotball, kaste ball, springe 400- og 60-meter, og ha bocchiaturnering. Sistnemnde er svært populær, og eg trur det er mange som er ute etter å slå fjorårets vinnar frå Selje. Meldingane er nemleg at konkurrentane ligg i hardtrening, seier Sandnes med eit smil.

I tillegg kjem mellom anna den nye leiaren i Møre og Romsdal Idrettskrets, Heidi Falkhytten, og Svein Nerland frå Folkehelsa.

Dyrke livsgleden

Sjølv om Monsiaden er ein dag der tevlinga er i fokus, er likevel grunnleggjaren klar på at det er livsglede og sosialt samkvem som står i sentrum.

– Mottoet vårt er «trim deg glad». Her skal vi dyrke gleda med å drive aktivitetar i lag med andre.

Sandnes rettar også ei hand ut til dei potensielle deltakarane som ikkje har fått invitasjon, fordi dei bur heime og ikkje er tilknytt eit omsorgssenter.

– Det var trist å høyre at enkelte ikkje har kome tidlegare år, fordi dei ikkje har vorte invitert. Dette er eit arrangement for absolutt alle utviklinghindra, og dei er hjarteleg velkomne.

Alle får premie, men Sandnes vil ikkje avsløre kva det er.

– I fjor lønna vi deltakarane med t-skjorter. I år vert det noko anna, og eg kan gje eit hint om at det er noko som kan redde livet ditt i mørket. Vil du vite meir, må du møte opp, seier grunnleggjaren lurt.

Festivalgeneral Mons Sandnes vil ikkje avsløre kva som vert årets premie på Monsiaden.