– Eg fann ut at jentene mine måtte få seg ei leikarhytte. Då eg sjølv var lita hadde eg ei stor leikarhytte, men i katalogane fann eg berre små leikarhytter. Dottera mi Karianne pusla eit puslespel med bestemora med bilete frå mummitrollet, og då slo det meg at sjølvsagt måtte det verte ei leikarhytte inspirert av mummihuset, seier Oksavik Kvien.

– Har gjort det meste sjølv

Etter at ideen var på plass, starta Oksavik Kvien med planlegging og teikningar. Ho bestemte seg for at det skulle vere to etasjar og hems når ho første skulle setje i gang med eit slikt prosjekt. Planlegginga starta for eitt år sidan, og no står mummihuset på Vartdal ferdig.

– Eg har gjort det meste sjølv. Mummihuset er teikna frå grunnen av, og det er ikkje noko byggjesett. For å få til søylene kjøpte eg meg dreiebenk, og dreia dei sjølv. Døra vart også laga sjølv, i tillegg til at listene er skore ut og alle har ein forskjellig mummifigur ovanfor vindauget. Det har teke eit år før det vart ferdig, og det har vore mykje arbeid. Taket vart laga på bakken, og så fekk eg hjelp frå bror min med å heise taket på plass med kranbil. Bror min er også snikkar, og eg har spurt han om råd rundt byggtekniske spørsmål. Mummihuset står på skikkeleg fundament, og det er også fullisolert.

Innlagt straum

Leikarhytta har også fått innlagt straum, og dermed vart det også parabol og tv fått sin plass. Det einaste som mummihuset manglar er toalett.

– Det var aldri i tankane, og då får vi også sjå ungane av og til, seier Oksavik Kvien med eit smil.

– Prøvd å bevare stilen

Då mummihuset vart teikna studerte Oksavik Kvien mummibøkene og tv-serien for å få detaljane riktig. Innvendig har leikarhytta også fått mummipreg. I første etasje er det kjøkken og leikekrok. I andre etasje er det kosekrok med tv. På toppen er det laga til hems med madrassar over heile hemsen. Det har allereie vore ei overnatting i mummihuset, og utover sommaren vert truleg fleire.

– Eg har prøvd å bevare stilen. Bestefar Dag har laga postkasse til huset, og når du ringer på dørklokka er det kjenningsmelodien frå tv-serien som vert spelt. Det ekte mummihuset har ikkje straum, men eg unnskylder meg med at den teknologien sikkert har kome til mummidalen også.

Mykje interesse

Etter at bygginga av mummihuset starta har mange fatta interesse for det.

– Det har vore mykje interesse. Folk går forbi og stikk gjerne hovudet bortom for å høyre kva vi held på med, i tillegg viser mummihuset igjen frå vegen. Då vindauga til huset vart levert mangla det eitt som vart ettersendt. Eg fekk melding frå sjåføren til Bring om morgonen som sa at han vart gira då han såg at han skulle levere eit vindauge til hit, og han hadde ikkje noko problem med å finne vegen igjen. Eg har også lagt ut bilete på Facebook frå bygginga undervegs.

Mange har eit kjært forhold til mummitrollet og resten av figurane i mummidalen, men få kjenner igjen huset.

– Ungane mine har alltid sett mummitrollet på tv, og likt det. Eit av dei første orda som Tiril sa var mummi, og dette er noko som alle ungar kjenner til. Eg har fått spørsmål frå vaksne om dette er Tobias i tårnet, men då kan ungane forklare at dette er mummihuset.

– Dei har vore tolmodige

Medan bygginga har pågått, har døtrene Karianne (6) og Tiril Bjørneseth venta i spenning på at mummihuset skulle verte ferdig.

– Dei har det veldig kjekt no når det er ferdig, og dei har vore veldig tolmodige. Eg sat sjølv på reia ved sida av leikarhytta då min far bygde, og det tok ikkje lang tid før eg masa om kor tid det var ferdig. No sat dottera mi på si reie og venta i spenning, men dei har venta tolmodig. Mummihuset har også vorte omsnakka i barnehagen, og når ferien er over skal dei få kome opp hit, seier Oksavik Kvien.

– Har lært mykje

Gjennom prosjektet med mummihuset har Oksavik Kvien lært mykje. Ho har tidlegare gått tre år på formgjevingslina ved Ørsta vidaregåande skule, og seier sjølv at ho alltid har likt å bruke hendene.

– Eg har alltid fått lov til å prøve ting då eg var mindre, og det vert også viktig for mine ungar. Eg har lært mykje gjennom arbeidet, og då spesielt byggteknisk.

– Har du nye prosjekt liggjande som du ynskjer å starte på?

– Ikkje med det første. Vi har eit hus som det står igjen litt oppussing på, og eg trur at vi skal prioritere vårt eige no, seier Oksavik Kvien.

Etter eitt års byggjetid står no mummihuset ferdig, og det vert brukt mykje.