Påska nærmar seg og då står det tradisjonen tru eit lammelår på menyen. Det er ofte høgdepunktet på matfatet for dei fleste i påskeveka, og med det rette tilbehøyret er du garantert suksess. Dette låret har fått eit lag med sennep-glasering med rosmarin og ein raus porsjon kvitløk og er servert med sprøsteikte hasselbackpoteter, honning- og smørsteikte rotgrønsaker og ein syndig god sjy- og fløytesaus.

Eit lammelår smakar aller best med masse urter og kvitløk og får den beste smaken dersom du vel å steike på lav temperatur og let det verte rosasteikt ved ein kjernetemperatur på ca. 62–64 grader. Då får du det mest møre og saftige lammekjøt du kan tenkje deg.

Ingrediensar:

• 1 lammelår (ca. 2,7 kg)

• salt & pepar

• 14–16 stk. amandine-poteter

• 4 sjalottløk

• ca. 5 dl god kjøtkraft

• ½ dl kvitvinseddik

Sennepsglasering:

• 3 ss Dijon sennep

• 4 fedd kvitløk, knust

• 3 ss fersk rosmarin, finhakka

• 1 ss fersk persille, finhakka

• skalet av 1 sitron, finrive

• 1 ss akasiehonning

• 1 ss griljermjøl

Rotgrønsaker:

• valfri blanding rotgrønsaker (for 6 personar)

• 3 raudløk

• 2 ss akasiehonning

• maldonsalt & pepar

• smør & olivenolje, til steiking

Sjy- og fløytesaus:

• 1 sjalottløk, finhakka

• 2 ss smør

• 1 ½ ss kveitemjøl

• krafta frå panna (ca. 3 dl) + 1 dl ekstra kjøtkraft/vatn

• ½ dl raudvin

• 2 ½ dl matfløyte

• salt & pepar

Forvarm omnen til 150 ºC. Tørk godt av lammelåret alt av væske- og blodrestar. Fjern gjerne isbeinet for å få eit lår du kan skjære fine stykke av. Gni inn låret med salt og pepar og legg i ei stor langpanne. Skjær potetene opp i tynne skiver på ca. 2 mm utan å skjære heilt igjennom, slik dei framleis heng saman. Legg dei rundt låret. Del sjalottløk i to og ha i panna. Bland saman kraft og kvitvinseddik og hell det over i panna. Stikk eit steiketermometer inn i tjukkaste delen på låret utan at du treff på bein.

Bland saman ingrediensane til glaseringa og smør det utover heile oversida av lammelåret. Set panna inn i omnen og lat steike til du har ein kjernetemperatur på ca. 55 ºC. Skru deretter opp omnstemperaturen til 225 ºC varmluft får å få ei betre steikt utside på låret. Når kjernetemperaturen på låret har nådd ca. 60–62 ºC tek du det ut og pakkar inn i aluminiumsfolie. Medan kjøtet får kvile vil temperaturen framleis stige litt ekstra. Ta vare på krafta i panna og set til sides. Legg nokre klattar med smør på potetene, set dei inn i omnen igjen og lat steike vidare til dei har fått ei sprø utside.

Skjær opp rotgrønsakene i små terningar på ca. 1 cm. Varm opp ei steikepanne med litt olivenolje og steik på middels høg varme til dei har fått steikeskorpe. Ha i kutta raudløk, honning og ein klatt smør og steik vidare til grønsakene er møre. Krydre med salt og pepar.

Ha sjalottløken i ein kjele med smøret og lat surre på lav varme. Ha i mjølet og rør godt. Tilset krafta frå lammet, ekstra kraft og raudvin og kok opp. Ha i fløyte og lat småputre i 5–7 minutt. Smak til med salt og pepar. Skjær låret i tynne skiver og server saman med poteter, grønsaker og saus.

Mari-Lene Helgamat: Helgamat er Møre-Nytt si matspalte, og står på trykk i avisa kvar laurdag. Kari Ryslett og Mari-Lene Korsnes er spaltistar. Spalta er eit samarbeid mellom Møre-Nytt og Vikebladet Vestposten. Om spaltisten: Eg heiter Mari-Lene Korsnes og er for tida student i Matkultur og helse ved Høgskulen i Volda, jobbar som butikkmedarbeidar og driv i tillegg matbloggen www.medhjerteformat.com. Min store lidenskap her i livet er mat og då spesielt mat laga frå botnen av. Eg håper med dette på å kunne inspirere og påverke andre til å eksperimentere og kose seg med matlaging! Foto: Marius Myklebust