Setjefiskanlegget i Steinsvika vart bygd på 80-talet, og vart sidan kjøpt opp av Pan Fish og deretter Marine Harvest. No ligg det føre store planar om riving av gamal bygningsmasse, utviding og nybygging.
Størst i landet
Det nye anlegget vert topp moderne, og vil vise godt igjen i bygda. For å gjere plass til ny bygningsmasse skal det gamle oppdrettsanlegget og dei tidlegare lokala til Møre Skofabrikk rivast. På sikt skal også nedlagde Steinsvik skule rivast for å gje plass til ny dyrkamark.
Mot sjøen skal strandlinja fyllast ut opp til 25 meter somme stader for å gje plass til ny bygningsmasse.
Resirkulering av vatn
Regionansvarleg for ferskvatn i Marine Harvest, John-Ivar Sætre opplyser at bygningsperioden er rekna til om lag to år, og vil ha ein kostnadsramme på 170 – 180 millionar kroner. Anlegget vil få konsesjon på 7,5 millionar smolt og vert det største og mest moderne anlegget i landet som nyttar resirkulering av vatn.
Sætre seier at grunnarbeidet truleg vil ta til i haust, og at produksjonen skal kome i gang i løpet av 2014 eller 2015.
I dag arbeider 4–5 personar på anlegget, og Sætre reknar med å minst doble talet på tilsette etter utvidinga.
