Hovdebygda-løparen beviste at ho ikkje har noko å frykte når ho om knappe to år tek steget opp i seniorklassen. Øye har lagt ein plan. Det langsiktige målet er å verte ein god seniorløpar. 18-åringen har tru på at det skal vere muleg dersom ho fortset den fine utviklinga i langrennssporet. 20.-plassen på NM-sprinten var ein ny indikasjon på at gymnasiasten er på rett kurs. Ho håper det kan vere muleg å få gå fleire distansar i det neste noregsmeisterskapen. I 2015 kan også juniorverdsmeisterskapen komme til å verte eit mål for tenåringsjenta.
– Eg har planer om å fortsette skisatsinga sjølv om eg til våren må reise ut for å studere. Det vil vonleg verte enklare snøforhold når eg flytter på meg. Mulegheita for å verte ein del av eit større treningsmiljø kan vere med på å auke motivasjonen. Sjølv om det har gått greitt å motivere seg for dei daglege treningsøktene, seier Ingvild som har ein meir utfordrande kvardag enn flesteparten av konkurrentane. Dei er elevar ved eit eller anna skigymnas og får trene i skuletida. Den mulegheita har ikkje den talentfulle juniorløparen.
Gjekk vidare
– Eg prøver å gjere det beste ut av situasjonen, sa Ingvild etter sitt første møte med nokon av dei største norske OL-håpa.
Tredjeårsjunioren hadde ikkje sett seg noko konkret mål då ho sette kursen for NM på Lillehammer. Ingvild følte med NM-arrangørane i Molde som måtte flytte arrangementet på grunn av den milde vinteren. Det var kjempeforhold på Skaret i helga. Men snøen kom for seint til at Øye fekk mulegheit til å debutere i senior-NM i heimfylket. Det var på ingen måte forhold som favoriserte Øye under NM-sprinten.
Krinslagsløparen trivast aller best når det er faste og fine forhold. Det var langt frå det då ho avanserte til kvartfinale. Ingvild følgde opp med eit nytt bra løp då ho vart nummer fire i sitt heat. Ho var både nokon erfaringar og opplevingar rikare etter å ha fått vist seg fram på TV. No ventar renn i Trøndelag og ein hard treningsperiode. Det primære fokuset er å bygge opp ein formtopp til dei tre norgescuprenna på Gjøvik i midten av februar. Ho har lyst til å prestere i det arrangementet. Mulegheitene for det bør vere gode.