Onsdag leverte Kjell Krumsvik i Ørsta Bil elleve elbilar til Volda kommune.
– Bilane skal brukast av tilsette i helse- og omsorgssektoren – heimebasert omsorg, rus og psykiatri og elles alle som treng å kome seg rundt til brukarane, seier Svein Berg-Rusten, kommunalsjef helse og omsorg i Volda kommune.
Elbilane, som er av merket Nissan Leaf, skal erstatte bensin- og dieseldrivne bilar som Volda kommune har leasa.
– Og vi har rekna ut at vi kjem til å spare 1,4 millionar kroner årleg på å kjøpe desse elbilane i staden for å lease bensin- og dieselbilar, seier Berg-Rusten.
Frå før har kommunen kjøpt elleve el-varebilar av Ørsta-firmaet, og desse vert brukte av tilsette i eigedomsavdelinga og teknisk avdeling.
– Elbil-innkjøpa er ein del av den grøne profilen til Volda kommune. Og det er naturleg at kommunen går føre på dette området, seier Berg-Rusten.
Krumsvik gav alle dei framtidige elbilsjåførane ei kort innføring i bilane sine finesser, forklarte at dei har ei rekkevidde på 39 mil, og garanterte at bilane er «svære greier».
– Som med praktisk talt alle nybilar, så har det vore lang leveringstid. Åtte månader har gått sidan Volda sende inn si bestilling til vi no kan levere bilane, sa Krumsvik.