– No er enda meir av Festspel-programmet klart. Dei nye, store namna som står på plakaten er Agnes Ravatn, Ruth Lillegraven, Vilde Tuv, Anna Kleiva, Erlend Apneseth og Erlend Nødtvedt, skriv Nynorsk kultursentrum i ei pressemelding.
No kan barn, unge og vaksne velje og vrake i om lag 15 programpostar under Festspela i juni.
– Og fleire kjem til å kome etter kvart. Vi har teke med oss mange tradisjonar frå tidlegare år, men har også røska litt opp i både form og stil, seier formidlingsleiar i Nynorsk kultursentrum Tone Slenes.
Ho vektlegg at det er eit godt team som har jobba fram årets program
– Kom til tunet og opplev nynorsk kultur saman med oss! seier Slenes.
Festspelfesten på opningsdagen torsdag blir avrunda med ei spesiell oppleving av diktinga til Olav H. Hauge, kalla Black Hauge, av Erlend Apneseth og Erlend Nødtvedt. Seinare på kvelden møtast Erlend Nødtvedt og Anna Kleiva på Målbar på Folkehøgskulen for å filosofere rundt det å skrive til musikk, står det.
Urframføring spesielt laga til Ørsta
Forfattar Anna Kleiva og musikar Vilde Tuv skal ha ei urframsyning av Tingingsverket til Festspela 2023.
– Poetiske vers møter elektronisk musikk midt i den trolske fjellheimen, i eit verk som er spesielt laga med omsyn til naturen i Ørsta, står det i pressemeldinga.
– Kleiva har familie på Vartdal og har difor vore der om somrane i løpet av oppveksten. No møter vi henne i eit unikt samspel med Tuv, seier produsent i Nynorsk kultursentrum, Kim Åge Furuhaug.
Arrangementet startar som ein fottur (ev. køyretur for dei som treng det) til setra i Romedalen. Her kan både barn og vaksne oppleve noko heilt utan om de vanlege, står det.
Kunsten å flytte heim
– Forfattarane Agnes Ravatn og Ruth Lillegraven har noko til felles: Dei har begge flytta heim, står det.
Ravatn flytta heim til Sveio og Lillegraven til Granvin. Journalist og forfattar Kjersti Mjør leier samtalen mellom dei to heimkomne.
– Både torsdag, fredag og laurdag blir det spanande program på Målbar på Folkehøgskulen. Her får du møte ulike forfattarar i ein dempa setting og lytte til gode samtalar om alt frå litteratur og musikk, til dei store samfunns- og livsspørsmåla, avsluttar Furuhaug.